Depýtattar men AShM qoǵam qaıratkerleriniń jerdi paıdalanýǵa baılanysty usynystaryna pikir bildirdi
Óz sózinde qoǵam qaıratkeri Muhtar Taıjan Jer Kodeksine engizý buryn da aıtylǵan birqatar usynystardy taǵy bir márte eske saldy. Naqtyraq aıtsaq, aýylsharýashylyǵy jerlerin jalǵa alý ınstıtýtyn engizý, biryńǵaı agrarlyq salyq, sondaı-aq, jerge ǵaryshtyq monıtorıng jasaýdy zańdastyrý týraly atap ótti.
Sonymen birge, jer qatynastary salasyn tehnologııalyq jańǵyrtý jáne tsıfrlandyrý, aýylsharýashylyǵy jerlerin jalǵa alý ınstıtýtyn jetildirý jáne retteý máseleleri talqylandy.
Májilis depýtattary men Aýyl sharýashylyǵy mınıstrligi ókilderi túsken usynystardyń barlyǵy nazarǵa alynatynyn aıtty.
«Talqylaý barysynda qoǵamdyq belsendiler tarapynan aýylsharýashylyǵy jerlerine qatysty naqty 4 usynys tústi. Májilis jumysy árqashanda ashyq. Depýtattar usynystardyń barlyǵyn talqylaıdy. Sondyqtan, búgingi dóńgelek ústel barysynda túsken pikirler de sarapqa salynady. Osy rette, bir máselege nazar aýdarǵym keledi. Jer Kodeksinde jerdi jeke menshikke ótkizýge tyıym salýdy alyp tastaýǵa nemese sheteldikterge, azamattyǵy joq tulǵalarǵa, sheteldikter qatysqan kompanııalarǵa jalǵa berýge qatysty ózgerister joq»,-dedi, Májilistiń Agrarlyq máseleler komıtetiniń tóraǵasy Saparhan Omarov.
«Jer, ásirese, aýylsharýashylyǵynda iri kapıtal, resýrs. Onsyz eshteńe óndirý múmkin emes. Eger jer tıimsiz paıdalanylsa, ony sheshýdiń tetikterin qarastyrýymyz kerek. Qoǵamdyq qaıratkerler usynystaryn aıtty. Usynystar joǵary kásibı deńgeıde daıyndalǵan. Onyń barlyǵyn tııanaqty saralap, taldap, odan keıin Úkimette zerdelep, Májiliste qaralatyn AÓK týraly zań jobasy aıasynda talqylaý qajet», -dedi Premer-Mınıstrdiń orynbasary, Aýyl sharýashylyǵy mınıstri Ómirzaq Shókeev.