Depýtattar Mańǵystaý oblysyndaǵy jaǵdaıǵa qatysty pikir bildirdi
«Osy saýalymyz Mańǵystaý oblysynyń tutynýshylaryna arnalǵan suıytylǵan munaı-gazyna baǵanyń kóp kóterilýine baılanysty. Bul azamattardyń narazylyǵyn týǵyzyp, aımaqta áleýmettik shıelenisti kúsheıtip jibergeni belgili. Jaǵdaı Memleket basshysy Qasym-Jomart Kemeluly Toqaevtyń jeke baqylaýyna alyndy. Prezıdenttiń tapsyrmasy boıynsha úkimettik komıssııa jumys istedi, ol qalyptasqan jaǵdaıdyń ońtaıly sheshimin tapty. Problema jańa jyldyń alǵashqy kúnderi shıeleniskenine qaramastan, onyń alǵysharttary budan da burynyraq belgili bola bastaǵanyn atap ótý kerek. Suıytylǵan gaz naryǵyna, otynnyń tapshylyǵyna, saladaǵy baǵa belgileýge qatysty máselelerdi birneshe ret Májilis depýtattary da kótergen edi», - dep toqtaldy depýtat B. Smaǵul jalpy otyrysta
Osy oraıda ol atalǵan máseleniń birqatary rettelse de, alaıda birqatary sheshimin tappaǵanyn atap ótti.
«Birinshiden, Energetıka mınıstrligi baǵanyń bulaısha ósýin 2022 jylǵy 1 qańtardan bastap suıytylǵan gazdyń 100 paıyz elektrondy saýda alańy arqyly satylatynyn túsindirdi. Úsh jyl ishinde (zań kúshine engennen keıin) saýda alańynda naryqtyq tetikter qalyptasyp úlgermedi. Saýda-sattyqty Energetıka mınıstrligi «qolmen basqarý» rejımine ótkizdi. Bul «knopkaly» aýktsıon dep atalatyn jaǵdaıǵa jetkizdi. Bul elektrondy alańdar tetiginiń bedelin ketirip, nátıjesine qol jetkizbedi. Sóıtip, búgingi kúni daǵdardystyq jaǵdaıǵa ákelip tirep otyr», - dedi depýtat.
Sonymen qatar, ol elimizde suıytylǵan gaz satýdyń biryńǵaı ulttyq naryǵy qalyptaspaǵanyn aıtty. Onyń esesine, suıytylǵan gaz tapshylyǵy oryn aldy, kórsetkishi 2021 jyly 15 paıyzǵa jetti.
«Kóterme saýda naryǵyndaǵy alypsatarlyqty joıý jáne saýda-sattyqtyń ashyqtyǵyn arttyrý maqsatymen ótken jyly Parlament bırjalyq saýdany uıymdastyrý jóninde keıbir zań aktilerine ózgerister men tolyqtyrýlar engizdi. Zań kúshine endi, alaıda Energetıka mınıstrligi suıytylǵan gazdy ótkizýdiń jańa erejelerin áli kúnge deıin jasaǵan joq. Osy ózekti máselelerdi rettemeıinshe, bizde baǵanyń sharyqtaýy suıytylǵan gazǵa ǵana emes, taýarlardyń, jumystardyń jáne kórsetiletin qyzmetterdiń kóptegen túrinen baıqalatyn bolady. Túptep kelgende, budan qarapaıym tutynýshy zardap shegedi», - dedi ol.
«Bizdiń bárimiz bul kúnderi Jańaózende, Aqtaýda bolǵan oqıǵalarǵa kúızeldik. Barlyǵymyz tynyshtyq pen qoǵamdaǵy turaqtylyqty saqtaýǵa, ózara tıimdi sheshim qabyldaýǵa jáne Qasym-Jomart Kemeluly Toqaev atap ótkendeı, jaýapkershilikti tanytýǵa tıistimiz», - dedi B. Smaǵul.