Depýtattar «Made in Kazakhstan» brendin damytý máselelerin talqylady

ASTANA. QazAqparat - Qazaqstan Respýblıkasy Parlamentiniń ǵımaratynda «Óńdeý ónerkásibin, eksportqa ónim shyǵarý múmkinshiligi bar kásiporyndardy damytý. Ulttyq «Made in Kazakhstan» brendin damytý» atty taqyrypta Qazaqstan Respýblıkasy Parlamenti Májilisindegi «Nur Otan» partııasynyń Fraktsııasy janyndaǵy Ekonomıkalyq saıasat jónindegi keńestiń otyrysy boldy.

Іs-sharany Ekonomıkalyq saıasat Keńesiniń tóraǵasy, Májilistiń Áleýmettik-mádenı damý komıtetiniń hatshysy Beıbit Mamraev júrgizdi, dep habarlaıdy Májilistiń baspasóz qyzmetinen. Qazaqstannyń Eýrazııalyq ekonomıkalyq odaqtyń jáne Dúnıejúzilik saýda uıymynyń múshesi bolýy otandyq taýarlardyń álemdegi saýda naryqtarynda básekege qabilettiligin arttyrady.

Sarapshylardyń aıtýynsha, búgingi kúni Qazaqstannyń óńdeý ónerkásipteri qarqyndy damýda. Sonymen qatar, qara, tústi metallýrgııa, hımııalyq jáne farmatsevtıkalyq óndiristik sektorlardyń ózinde de ósý baıqalýda. Qazirgi kezde Qazaqstan dúnıe júziniń 118 memleketterine óńdeý ónerkásipteri shyǵaratyn taýarlardyń 800 túrin eksportqa shyǵarady. Al  mashına jasaý jáne qurylys materıaldaryn shyǵarý salalaryndaǵy óndiriste báseńsý baıqalady. Problemalardy talqylaý barysynda, QR Parlamenti Májilisiniń depýtattary ekonomıkanyń shıkizattyq emes taýarlar shyǵarý salasyndaǵy iske qosylǵan jáne olarǵa taýarlardy eksporttyq shyǵarý, eksportqa shyǵarýǵa daıyndyq jasaýǵa nesıe berý arqyly qoldanystaǵy kásiporyndardy qarjylandyrý bıznes sýbektilerine qoldaý kórsetý sharalary shıkizattyq emes taýarlardy eksportqa shyǵarý bóligin arttyrý boıynsha máselelerdi keshendi sheshýge jetkiliksiz jáne jetildirmegendigin atap ótti. Tájirıbe kórsetip otyrǵandaı, Qazaqstannyń saýda sórelerindegi taýarlardyń basym bóligi sheteldik taýarlardyń úlesinde, al otandyq taýarlardy syrtqy naryqqa shyǵarý is-sharalary tek qana shetelderde aqparattyq-jarnamalyq stendter ilýmen, kórmeler, saýda mıssııalaryn ótkizýmen shektelýde.

Otyrysqa Qazaqstan Respýblıkasynyn Parlament Májilisi depýtattary, mınıstrlikter, ulttyq kompanııalar, óńdeý ónerkásibininiń, BAQ-tyń basshylary men ókilderi qatysady. Keńes otyrysynda Qazaqstan Respýblıkasynyń ınvestııa jáne damý mınıstrliginiń vıtse-mınıstri T.Toqtabaev, «Báıterek» Ulttyq basqarýshy holdıngi» AQ Basqarma Tóraǵasynyń orynbasary  L.E. Ibragımova, «ATAMEKEN» Qazaqstan Respýblıkasynyń ulttyq kásipkerler palatasynyń Tóraǵa orynbasary T.Shotanova, Qazaqstan Respýblıkasy Parlamenti Májilisiniń depýtaty,Ekonomıkalyq saıasat jónindegi Keńesiniń múshesi A.P. Sharapaev, «QazAGRO» Ulttyq Basqarýshy Holdınginiń Basqarma Tóraǵasy N.T. Malelov, «Kazaqstanda jasalǵan» taýar óndirýshilerdiń jáne kásipkerlerdiń qaýymdastyǵy» zańdy tulǵalar birlestiginiń Tóraǵasy O.A. Qudaıbergenov baıandama jasady. Іs-sharaǵa «Nur Otan» partııasy men Fraktsııa basshylyqtary, Qazaqstan Respýblıkasy Parlamenti Májilisiniń depýtattary, Qazaqstan Respýblıkasynyń Investıtsııalar jáne damý, Aýyl sharýashylyǵy, Ulttyq ekonomıka jáne Syrtqy ister mınıstrlikteriniń, Ulttyq «Atameken» kásipkerler palatasynyń, damý ınstıtýttarynyń, óńdeý óndiris kásiporyndary men buqaralyq aqparat quraldarynyń basshylar jáne ókilderi qatysty.

Keńes otyrysynyń qorytyndysy boıynsha usynymdar qabyldandy. Shara barysynda qatysýshylar «Made in Kazakhstan» brendiniń taýarlaryna uıymdastyrylǵan kórmeni tamashalady.