«Depýtattar hatty eleı me?» - BAQ-qa sholý
***
«Egemen Qazaqstan» basylymynyń jazýynsha, Sozaq aýdanyndaǵy tabıǵı apattan zardap shekken 42 áleýmettik nysan men 1949 jeke turǵyn úıge júrgizilgen qurylys tolyq aıaqtaldy. Jalpy, aýdandaǵy áleýmettik nysandar men jeke turǵyn úılerdi qalpyna keltirýge 15 qurylys uıymy, 68 tehnıka jáne 1184 adam jumyldyrylǵan bolatyn. «Oblys ákimi Asqar Myrzahmetovtiń kúndelikti Sozaq aýdanyndaǵy tabıǵı apat saldarynan búlingen turǵyn úıler men áleýmettik nysandardy qalpyna keltirý jóninde selektorlyq keńester ótkizip, tikeleı óz baqylaýyna alǵanynyń jáne oblys halqynyń bereke-birliginiń arqasynda jumys nátıjeli boldy. Sozaq aýdany boıynsha shyǵyn 343,4 mln. teńgeni quraǵan»,-dep jazady gazet.
***
«Aıqyn» gazetiniń jazýynsha, bolashaqta Qazaqstanda shyǵarylatyn dári-dármekterdiń qaýipsizdigi úshin alańdamaıtyn bolamyz. Óıtkeni 2015 jylǵa deıin elimizdegi farmatsevtıkalyq ónim shyǵaratyn zaýyttar GMP «Tıisti óndiristik tájirıbe» standartyna kóshýi tıis. Al keshe atalǵan halyqaralyq standart SantoMemberoPolpharmaGroup kompanııasynyń basqarýyndaǵy «Hımfarm» AQ-qa tabys etildi. Bulaı etpeske shara joq, óıtkeni 2008 jyly otandyq zaýyttar 10 mlrd teńgeniń dárilerin shyǵarsa, byltyr bul kórsetkish 28 mlrd teńgege jetip otyr. Demek, bul salada san ǵana emes, sapa da ósýi kerek. Halyqaralyq GMP «Tıisti óndiristik tájirıbe» standartyn Qazaqstanda tabys etý - Densaýlyq saqtaý mınıstrliginiń Medıtsınalyq jáne farmatsevtıkalyq qyzmetti baqylaý komıtetine júktelgen. Atalǵan komıtet tóraǵasynyń orynbasary Larısa Paktyń aıtýynsha, farmatsevtıkalyq ónimderdiń sapasy otandyq óndirýshiler úshin óte mańyzdy. Bul maqala basylymda «Dáriniń sapasy jaqsaryp, sany da artýy kerek» degen taqyryppen berilip otyr.
Osy basylymda «Depýtattar hatty eleı me?» atty materıal berilgen. Aýǵan soǵysy ardagerleri men múgedekteriniń qoǵamdyq birlestikteriniń úılestirýshi keńesi keshe taǵy da bas qosyp, óz mártebelerin zań júzinde bekitýdi usyndy. «Osyǵan deıin zań jobasyn talqylaý maqsatynda depýtattarmen de, sheneýniktermen de kezdestik. Olardyń eshqaısysy zańdy qajet emes demeıdi. Biraq mardymdy jaýap ala almadyq. Sondyqtan depýtattarǵa jazbasha túrde úndeý joldamaqpyz. Zań boıynsha, olar bizge bir aı ishinde jaýap qaıtarýy tıis. Kelgen jaýapty talqylaǵan soń, soǵys ardagerleriniń mártebesine qatysty zańnyń qabyldanýyna muryndyq bolamyz»,- deıdi Aýǵan soǵysy ardagerleri men múgedekteriniń qoǵamdyq birlestikteriniń úılestirýshi keńesiniń tóraǵasy Murat Abdýshkýrov.
***
«Alash aınasy» gazetiniń «Alashty alańdatqan saýal» aıdaryndaǵy «Kezinde dollarmen berilgen nesıelerdi teńgege aýystyratyn kez jetken joq pa?» degen maqalada ózekti másele kóterilip otyr. «Elimizdegi ekinshi dárejeli bankterdiń eshbiri halyq úshin jumys istep jatqan joq. Esebin taýyp, eldi tonap qalýdy ǵana oılaıdy. Mysaly kóp jaǵdaıda dollarmen qabyldaý bank úshin óte tıimdi. Sebebi oınaqy baǵam ústeme aqyny bolsyn, negizgi qaryzdy bolsyn arttyrady. Bizde nesıeni dollarmen, eýromen jáne teńgemen alýǵa bolady. Al valıýtanyń túrin nesıe alýshy ózi tańdaıdy. Biraq sol nesıeni qaıtarar kezde qandaı valıýtamen tóleımin degen tańdaý joq, eskerilmegen. Negizi, árıne, azamattardyń ózderi nesıege qujattaryn rásimdeý kezinde tańdaý jasaıdy. Biraq kezinde dollarmen berilgen nesıelerdi teńgege aýystyrý úshin zańdyq turǵyda ózgertýler men tolyqtyrýlar qajet. Jalpy, bankterdiń usynǵan nesıelerin ulttyq valıýta - teńgemen berý júıesine aýysatyn ýaqyt jetti dep oılaımyn», - deıdi ekonomıka ǵylymynyń doktory, professor Atamurat Shámen.
Osy basylymnyń jazýynsha, Japonııada ónertapqyshtardy qurmetteýdiń sharyqtaý shegine jetkeni sonshalyq - olarda ár aı saıyn árbir kóshede, árbir aýdanda, ár oblysta ónertapqyshtar saıysy bolyp turady. Biraq keleshekte órkendeımiz, elde óndiris oshaqtaryn jandandyramyz desek, ónertapqyshtarǵa kóńil bólinýi qajet. Jýrnalıstiń «Іske aspaıtyn patentpen ónertabysty órkendete alamyz ba?» degen maqalasynda ónertapqyshtyqty qoldaý máselesi jaıly aıtylady.