Depýtattar Google jáne ıAndeks-kartalardy qazaqstandyq júıemen aýystyrýdy usyndy

ASTANA. QazAqparat - Búgin Májilistegi Úkimet saǵatynda depýtattar QR Qorǵanys jáne aeroǵarysh ónerkásibi mınıstri Beıbit Atamqulovqa qazaqstandyq spýtnıkterdiń málimetteri negizinde geokartalardy qurýdy usyndy, dep habarlaıdy QazAqparat.

«Bizdiń jer serikterimizdiń málimetteriniń negizinde daıyndalǵan otandyq geokartalardy qashannan bastap paıdalana alamyz? Osy oraıda ıAndeks-karta men Google Maps-tyń ornyna ózimizdiń ónimdi qashan  iske qosamyz? Nemese bizge ımportty ónimdi tutynǵan arzanǵa túse me?»,-dep surady depýtat Murat Temirjanov.

Sonymen qatar Úkimet saǵatynan keıin dál osy saýal  tilshiler tarapynan qoıyldy.

Óz kezeginde mınıstr Beıbit Atamqulov bul baǵyt otandyq baǵdarlamalyq ónimderdi  qurýmen baılanysty ekenin jetkizdi.

«Atap aıtqanda, eskertý softerlik ónerkásipke qaraı baǵyttaldy. Búginde bizdiń mınıstrlik softerlik ónerkásipti jandandyrý turǵysynda jumystardy bastap jatyr. Osy baǵytty damytý úshin iske asyrylǵan barlyq múmkindikterimizdi paıdalana alamyz», - dedi vedomstvo basshysy.

Aıta keteıik, búginde Qazaqstanda ǵaryshtyq baılanys jáne jerdi qashyqtyqtan zondtaý boıynsha eki ǵaryshtyq júıe tabysty jumys isteýde. «KazSat» ǵaryshtyq baılanys júıesi» «KazSat-2» jáne «KazSat-3» Aqmola oblysynyń Aqkól qalasynda jáne Almaty qalasynyń  mańyndaǵy eki jer ústi basqarý keshenderinen turady.

2023 jylǵa qaraı «KazSat-2R» jasalyp, onymen «KazSat-2» jer serigi josparly aýystyrylmaq. Al qazirgi ýaqytta Jerdi qashyqtyqtan zondtaý eki spýtnıkten turady, ıaǵnı osy toptamada «KazEOSat-1», «KazEOSat-2» apparattary qamtylǵan.