Depýtattar FlyArystan bıletiniń baǵasyn arzandatýdy talap etti

Májilis depýtattary qazaqstandyq FlyArystan loýkosteriniń baǵasyna narazylyq bildirip, bılet qunyn tómendetýdi talap etti, dep habarlaıdy QazAqparat.

«2019 jyly birinshi otandyq loýkoster qurylǵanda Májiliske beıindi mınıstrliktiń, azamattyq avıatsııa komıtetiniń basshylary kelip, kompanııanyń maqsaty – aýmaqtyq qalalardy qamtý, qymbat reısterge básekelestik jasaý jáne bıletti 10 myń teńgeden aspaıtyn arzan baǵada satý dep sendirgen edi. Shyn máninde báseke paıda bolǵan joq, kerisinshe, bılet baǵasy Air Astana jáne loýkoster bolyp sanalmaıtyn basqa kompanııalarmen shamalas. Bul jolaýshylar tarapynan narazylyq týǵyzdy», - dedi «Aq jol» fraktsııasynyń depýtaty Erjan Beısenbaev Májilistiń jalpy otyrysynda.

Ol basqa avıakompanııalardyń dál osyndaı baǵaǵa júk tasymaldaý qyzmetterin qosatynyn, sý beretinin aıtty.

Bıletti arzanyraq alý úshin birneshe apta buryn satyp alý kerek.

Al shuǵyl jaǵdaılarda, densaýlyq nemese otbasylyq jaǵdaıyna baılanysty qazaqstandyqtar qymbat bılet alýǵa májbúr.

Bul azamattardyń ózderine de, týrızmniń damýyna da keri áser etedi.

Depýtat Túrkııadaǵy loýkosterlerdiń damýyn mysal etti, ondaǵy ishki reısterdiń baǵasy eldiń halyqaralyq avıatasymaldaýshylaryna qaraǵanda arzan jáne qyzmet kórsetý sapasy da kem túspeıdi. Italııada da ishki reısterdiń belgilengen baǵasy bar.

Onyń aıtýynsha, FlyArystan jolaýshylardyń múddesine emes, barynsha paıda tabý úshin jumys isteıdi.

«Aqjol» partııasy FlyArystan avıabıletteriniń baǵasyn tómendetýdi talap etedi», - dedi ol.

Sonymen birge, depýtat FlyArystan áli kúnge deıin Air Astana kompanııasyna tıesili ekenin atap ótti.

Tipti eki kompanııanyń býhgalterlik esebi de bólinbeıdi. Olardyń ıesi bir jáne bul monopolııa bolyp sanalady.

Árıne, eki kompanııa bir-birimen básekelese almaıdy. Sondyqtan depýtattar olardy tez arada bólýdi talap etip otyr.