Depýtat jýrnalıstıka boıynsha oqý granttaryn kóbeıtýdi usyndy
Depýtattyq saýaldy májilismen Premer-Mınıstrdiń orynbasary Erbolat Dosaevtyń atyna joldady.
«Qazirgi ýaqytta joǵary bilikti jýrnalısterdiń jetispeıtindigi anyq sezilip otyr. Keıingi kezde keıbir otandyq tele jáne radıoarnalardyń baǵdarlamalarynyń sapasy kópshiliktiń kóńilinen shyqpaı, ótkir synǵa alynyp júrgeni de sonyń aıǵaǵy. Memleket basshysy usynǵan «Rýhanı jańǵyrý» baǵdarlamasyn júzege asyrýda BAQ mańyzdy ról atqaratynyn eskere otyryp, jýrnalıstik kadrlardyń sany men sapasyn arttyrý máselesin kún tártibine shyǵaratyn kez jetti dep sanaımyz», - dedi ol.
Depýtat birinshiden bolashaq jýrnalısterdi daıarlaıtyn negizgi oqý oryndary bolyp sanalatyn Ál-Farabı atyndaǵy Qazaq ulttyq ýnıversıteti men L.Gýmılev atyndaǵy Eýrazııa ulttyq ýnıversıtetiniń jýrnalıstıka fakýltetteriniń áleýetterin barynsha tıimdi paıdalaný qajet ekenin basa aıtty.
«Atalǵan fakýltetter elimizdegi «Rýhanı jańǵyrý» qozǵalysynyń aldyńǵy shebinen kórinetin qoǵamdyq pikir kóshbasshylaryn daıarlaıtyn, bir kezdegideı bedeli óte joǵary, elıtalyq deńgeıdegi jýrnalıstik kadrlar ustahanalaryna aınalsa, artyq bolmas edi. Olar eń aldymen memlekettik BAQ-qa, memlekettik organdardyń baspasóz qyzmetterine qajetti joǵary bilikti maman kadrlar daıarlaýǵa mamandandyrylǵany jón dep bilemiz. Osyǵan oraı, atalǵan ýnıversıtetterge jýrnalıstıka mamandyǵy boıynsha memlekettik bilim berý granttaryn maqsatty túrde qarastyrý qajet», - dedi ol.
Májilismenniń aıtýynsha, ekinshiden, búgingi kúni Biryńǵaı elektrondy eńbek bırjasy arqyly bos turǵan 133 jýrnalıstik qyzmet oryny usynylyp otyr.
«Shyn máninde, bilikti jýrnalısterge suranys odan da kóp ekendigi anyq. Sondyqtan, jýrnalıstıka mamandyǵy boıynsha bólinetin memlekettik bilim berý granttarynyń sanyn jyldan jylǵa azaıtylý úrdisimen kelisý qıyn. Osyǵan baılanysty, QR Aqparat jáne kommýnıkatsııalar mınıstrligi respýblıkadaǵy BAQ jáne memlekettik organdarynyń baspasóz qyzmetiniń bilikti jýrnalıstik kadrlaryna suranystardy naqty zerttep, jýrnalıstıka mamandyǵyna bólinetin granttardyń sanyn kóbeıtýge usynys ázirlegeni jón dep oılaımyz. Úshinshiden, qazirgi JOO bitirgen jas jýrnalıster aýyldyq jerlerde jumysqa barǵysy kelmeı, kópshiligi qalalarda qalady. Sondyqtan, aýdandyq gazetterde eńbek etýge daıar jastardy «Dıplommen aýylǵa» áleýmettik baǵdarlamasyna engizýdi usynamyz», - dep túıdi Káribaı Musyrman.