Depýtat jetim balalardy baspanamen qamtýdyń keshendi josparyn ázirleýdi surady
Onyń aıtýynsha, qazirgi kezde kóptegen balalar úıleriniń túlekteri baspanasyz júr. 18 jastan asqan osy sanattaǵylardy jumysqa ornalastyrý, olardy baspanamen qamtý máselesi qaraýsyz qalyp otyr.
«Qaraýsyz qalý saldarynan olardyń zań buzýy nemese bireýdiń teris áserine ushyraýynyń qaýpi artady. Búginde depýtattar men jergilikti atqarýshy organdarǵa jetim balalardan kóptegen hattar men ótinishter kelip túsip jatyr. Balalardy qorǵaý úshin qajetti zańdar qabyldanǵanymen, is júzinde balalar úıiniń túlekteri baspanasyz qalyp otyr», - dedi depýtat Premer-Mınıstrdiń orynbasary Altaı Kólginovtiń atyna joldaǵan saýalynda.
Osy oraıda ol oblystar boıynsha keıingi 5 jyl ishindegi balalar úıleri túlekteriniń sany jóninde, jalpy orta, kásiptik orta bilim jáne joǵary bilim alǵandar, sondaı-aq 2017 jyldan beri baspanaly bolǵandar týraly aqparat berýdi surady.
«18 jastan asqan jetim balalar men ata-anasynyń qamqorlyǵynsyz qalǵan balalardyń biryńǵaı derekter bazasyn qurý, jetim balalardy turǵyn úımen qamtamasyz etýdiń keshendi josparyn ázirleý máselesin qarastyrýdy suraımyz», - dedi depýtat.
Budan buryn habarlanǵandaı, 2022 jyldyń 9 aıynda jetim jáne ata-anasynyń qamqorlyǵynsyz qalǵan 534 bala turǵyn úımen qamtamasyz etildi.
Sonymen qatar, tekserý kezinde jetim balalardy baspana kezegine qoıý merzimi saqtalmaǵany anyqtaldy.