Depýtat jedel járdem júrgizýshisin soqqyǵa jyqqan kúdiktini tez arada tabýdy talap etti
«Ókinishke qaraı, sońǵy kezde zańdy belden basyp, oıyna kelgenin isteıtin betimen ketkender kóbeıdi. Kúni keshe Qaraǵandyda bolǵan oqıǵa – sonyń aıqyn dáleli. Aıdyń kúnniń amanynda óz qyzmetin adal atqaryp júrgen jedel járdem júrgizýshisin qanjosa etip soqqyǵa jyǵý – baryp turǵan bassyzdyq. Quqyq buzǵan Nurbolat Dákebaevtyń bul áreketi – jáı ǵana qylmys emes, búkil qoǵamǵa, zań men tártipke ashyq qarsylyq, ne isteı alasyń degen dóń aıbat. Ózin beınetaspaǵa túsirip jatqanyn bilip tursa da, eshqandaı aıylyn jımaı judyryq siltep, qyzmettegi adamdy qanǵa bóktirýi – ábden shekten shyqqandyq, naǵyz qanypezerlik. 1 jasar sábıge kómekke kelgen medıtsına qyzmetkerlerin, ashyqtan-ashyq, kýágerlerdiń kózinshe uryp-soǵý ne degen sumdyq? Osyndaı oqıǵalar elimizde jeterlik. Osy kúnge deıin Depýtattyq korpýs birneshe ret medıtsına júıesiniń qyzmetkerlerin qorǵaý úshin arnaıy statýs bekitýdi usynsa da, Úkimet áli kúnge deıin sheshim qabyldamady», - dedi E. Beısenbaev Úkimet basshysy Álıhan Smaıylovtyń atyna joldaǵan saýalynda.
Onyń aıtýynsha, adam ómirin saqtaý úshin arpalysatyn aqhalatty jandardy arnaıy qyzmet kórsetýshi ókil retinde zańmen qorǵaý kerek.
«Bul bir ǵana oqıǵa emes. Almatyda avtobýs júrgizýshisin soqqyǵa jyǵýdyń qandaı qaıǵyly jaǵdaıǵa ákelgenine bárimiz kýá boldyq. Bul jarııa bolǵandary ǵana. Jabýly qazan jabýly kúıinde qalǵandary qanshama. Sondyqtan mundaı jaǵdaıǵa múldem jol berýge bolmaıdy. Búgin Dákebaev, erteń kim bolady sonda?! Bul jaǵdaı neni kórsetip otyr? Eń aldymen, tıisti organdardyń óz jumysyna salǵyrt qarap, quqyq buzýshylyqtardyń aldyn alý sharalaryn durys uıymdastyrmaǵanyn kórsetedi. Ekinshiden, kópshilik qarapaıym ǵana quqyqtyq qaǵıdalardy bilmeıtinin baıqatady. Olar óz quqyǵyn bylaı qoıǵanda, zań aldyndaǵy mindetteri men jaýapkershiliginen de habarsyz. Zań men tártip bárine birdeı qaǵıdatyn ustaný – árbirimizdiń mindetimiz. Úshinshiden, ulttyq qundylyqtardan ada, qazaqı ádep pen ar-uıatty umytqan, adamshylyqqa jat oılarmen sanasy ýlanǵan azamattar qalyptasyp keledi. Saldaryn kórip otyrmyz. Bul jaǵdaı eshqandaı jaqsylyqqa aparmaıdy», - dedi depýtat.
Bul turǵyda ol ýákiletti organdarǵa kelesi sharalardy qolǵa alýdy usyndy:
1. Quqyq qorǵaý organdary qylmys jasaǵan Dákebaevty tez arada tabýy tıis.
2. Nurbolat Dákebaevtyń sotyn ashyq júrgizip, qatań jaza berý jáne onyń barysy men qorytyndysy týraly buqaralyq aqparat quraldary arqyly halyqty túgel habardar etý.
3. Keıingi ýaqyttary adamnyń jeke basyna qaýip tóndiretin, tipti onyń ómirin qııatyn qylmystar qoǵamdyq sıpat alyp jatyr.
Sondyqtan, tez arada kez kelgen qylmystarǵa qoǵamdy múldem tózbeýshilik mádenıetin jappaı qalyptastyrýymyz qajet.
Budan buryn Qaraǵandyda er adam jedel járdem júrgizýshisin soqqyǵa jyqqanyn jazǵan edik.