Depýtat Jaıylǵanova: Reformanyń maqsaty - tıimdi atqarýshy bılik tarmaǵyn qurý
Jıynǵa qazaqstandyq sarapshylar men QR Parlamenti Májilisiniń depýtaty Anar Jaıylǵanova qatysty.
«Elimizdiń turaqty ári qarqyndy damýy - azamattarymyzdyń quqyqtary men bostandyqtaryn qamtamasyz etilýine jáne berik memlekettik bılik júıesine táýeldi. Qazaqstannyń jańa myńjyldyqtaǵy barlyq strategııalyq baǵytta damýyna myqty prezıdenttik bılik júıesi yqpal etti. Degenmen zaman bir orynda turmaıdy, bizdiń aldymyzǵa jańa talaptar qoıylýda. Qazir barlyq memleketter óziniń eń aýyr kezeńderiniń birin bastan keship jatyr. Osy tusta, bolashaqty baǵamdaı bilýimiz shart. Ony naqty jobaǵa aınaldyrýymyz kerek, ásirese onyń quqyqtyq negizdemesin quryp alǵan mańyzdy. Sondyqtan saıası, ekonomıkalyq jáne áleýmettik damýdyń eń ońtaıly formýlasyn izdeý barysynda, álemdik deńgeıdegi sátti saıasatker retinde Prezıdent naqty is-qımyl qajettiligine arqa súıeıdi», - dep atap ótti A. Jaıylǵanova.
Depýtat Konstıtýtsııada edáýir ózgerister oryn alǵanymen, Qazaqstan prezıdenttik basqarý formasynan jańylmaıtynyn atap ótti.
«Prezıdent, Úkimet pen Parlament arasyndaǵy ókilettilikterdi bólý qajettiligi týyndap otyr. Reformanyń basty maqsaty - bıliktiń jedel, jaýapty jáne tıimdi atqarýshy tarmaǵyn qurý, prezıdenttik basqarý formasyn saqtaı otyryp, parlamenttiń baqylaýshy rólin kúsheıtý. Prezıdent burynǵysynsha Konstıtýtsııa boıynsha elimizdiń eń joǵarǵy memlekettik bıligi bolyp qala beredi. Onyń quzyryna Konstıtýtsııany qorǵaý, memlekettik bılik tarmaqtary arasyndaǵy qarym-qatynastardy retteý, Qazaqstannyń qorǵanysyn, ishki jáne syrtqy qaýipsizdigin qamtamasyz etý kiredi», - dedi ol.
Aıta keteıik, 25 qańtarda Qazaqstan Respýblıkasy Prezıdenti Nursultan Nazarbaev bılik tarmaqtary arasynda ókilettikterdi qaıta bólý boıynsha arnaıy Úndeý jarııalaǵan bolatyn. Nátıjesinde, Prezıdenttiń 40-qa jýyq ókilettigi Úkimetke, Parlamentke berildi. Qazaqstanda bılik tarmaqtary arasynda ókilettikterdi qaıta bólý úderisi jan-jaqty ótip, Qazaqstan Konstıtýtsııasyna ózgeristerdi búkilhalyqtyq talqylaý 2017 jylǵy 26 aqpanǵa deıin jalǵasqan bolatyn. Arnaıy komıssııa qurylyp, halyqtyń barlyq usynys-tilekteri eskerildi. Búgin Prezıdent «Konstıtýtsııaǵa ózgertýler men tolyqtyrýlar engizý týraly» zańǵa qol qoıdy .