Depýtat jastar qatygezdigine ne áser etip otyrǵanyn aıtty

<p>ASTANA. KAZINFORM &mdash; Búgin Senattyń jalpy otyrysynda senator Darhan Qydyráli elimizdegi jastar arasyndaǵy zorlyq-zombylyq pen qylmystyń ósip kele jatqany týraly depýtattyq saýal joldady.</p>

Senatordyń aıtýynsha, bıylǵy toǵyz aıdyń kórsetkishi boıynsha kámeletke tolmaǵandar arasyndaǵy qylmys Soltústik Qazaqstan, Pavlodar, Ulytaý, Aqtóbe, Atyraý, Mańǵystaý oblystary men Astana, Almaty, Shymkent qalalarynda arta túsken.

Depýtat jastar arasyndaǵy problemalar bizde ǵana emes, jalpy álem jurtshylyǵynyń alańdatyp otyrǵanyn aıtty. Sondyqtan damyǵan elderde jastar, jańa urpaq týraly aýqymdy zertteýler júrgiziledi. Elimizde bul taqyryp ǵalymdar nazarynan tys qalyp jatyr.

«Mass-medıadaǵy basym kúsh kýlti, tanymal serıaldar men basqa da formalar arqyly agressııanyń nasıhattalýy qatigezdikti órshite túsetini aıan. Áleýmettik jeliler arqyly keń taralǵan oıyndar jastardyń tanymy men talǵamyn qalyptastyrady. Sonymen qatar ata-ananyń meırimin sezinbeý, otbasydaǵy túrli kıkiljiń men travma, bilim oshaqtary men tárbıe oryndarynda jastarǵa sotsıalızatsııa modelin usyna almaý sııaqty sebepterdi de joqqa shyǵara almaımyz. Tálimgerdiń aılyǵy tómen, synyp jetekshiligine tólenetin aqy az. Ortasha 10 mektepke 1 ıspektordan ǵana keledi», - dedi D. Qydyráli Úkimet basshysy Oljas Bektenovtiń atyna joldaǵan saýalynda.

Senator jastardyń problemasy ártúrli mınıstrlikter quzyretine bólinip ketkenin, biraq salaǵa jaýapty Jastar komıtetiniń óńirlerde tikeleı qurylymy joq ekenin atap ótti. Keıbir salalarda birneshe adam ǵana jastar saıasatymen aınalysady, bul týyndaǵan máseleni oń sheshýge múmkindik bermeıdi. Jalaqy tómen bolǵandyqtan, Jastar resýrstyq ortalyqtarynda bilikti kadrlar turaqtamaıdy.

«Zańdar men baǵdarlamalar qabyldanyp jatyr. Atqarylyp jatqan ister de az emes. Desek te bul ult bolyp oılanatyn ózekti taqyryp. Jastar saıasaty boıynsha basqarmalardy barlyq óńirlerde qaıta qurý mańyzdy. Jastardyń resýrstyq ortalyqtaryn jaqsartý kerek jáne aımaqtarda Komıýnıtı ortalyqtaryn ashý kerek. Ortalyq jáne aımaqtyq atqarýshy organdardyń jumysyn júıeleý úshin otbasy jáne jastar isi jónindegi komıtettiń quzyretin kúsheıtý qajet», - dedi Darhan Qydyráli.

Eske salaıyq, buǵan deıin 4 qazan kúni Talǵar qalasyndaǵy tóbelesten jasóspirim qaıtys bolǵanyn jazǵanbyz. 

Almaty oblysynyń Polıtsııa departamenti Talǵar qalasynda 16 jastaǵy jasópirimniń ólimine qatysy bar kúdiktilerdiń Qonaev qalasyna jetkizilgenin habarlady. 

Іshki ister mınıstri Talǵardaǵy jasóspirimniń ólimine qatysty isti baqylaýǵa aldy.