Aıgúl Quspan: Jas áskerı mamandar aılyǵynyń bárin páterge tólep júr

<p>ASTANA. KAZINFORM — Májilistiń halyqaralyq ister, qorǵanys jáne qaýipsizdik komıtetiniń tóraıymy Aıgúl Quspan Jibek Joly telearnasyna bergen suhbatynda áskerılerdiń zeınetaqysyn ósirýdi usyndy.</p>

«Qorǵanysqa qatysy bar salanyń bárine qarjy bólý kerek. Mysaly, qazir bir serjant 120 myń teńge jalaqy alady. Ol qazir taksıge barsa nemese dánekerleýshi bolyp istese, metallýrgııa kombınatyna baryp jumysqa ornalassa, 500-600 myń teńge alady. Al mysaly, Ulttyq ulannyń balalary kúnde kózderi móldirep júredi. Olardyń jalaqysy óte tómen. Sol jalaqyny baspana jaldaýǵa beredi. Óıtkeni úıleri joq. 3-4 jigit bir bólmede turady. Olar qalaı otbasy qurady, qalaı bala týady? Sondyqtan, birinshiden, jalaqysyn kóterý kerek», — dedi Aıgúl Quspan.

Májilis depýtaty zeınetke shyqqan áskerılerdiń de zeınetaqysyn ósirý kerek dep esepteıdi.

«Jas balalar solarǵa qarap sheshim qabyldaıdy ǵoı. „Myna shal kezinde polkovnık edi, qazir jaǵdaıy qandaı? Joq, men áskerı bolmaımyn“ degen oı túıedi. Olardyń zeınetaqysy ósýi kerek», — dedi depýtat.