Depýtat: V3 blogyndaǵy 113 myń pedagogtiń aılyǵyn kóterý kerek
— Qańtarda mektepterdi aralap ujymmen kezdestim. Sol kezde áleýmettik pedagogtardyń azǵantaı aılyǵy men bilim ordalaryndaǵy qarapaıym qyzmetkerlerdiń túkke jetpeıtin jalaqysy týraly másele aıtyldy. 2023 jyly áleýmettik pedagogterdi V3 fýnktsıonaldyq blogynan V2 fýnktsıonaldyq blogyna aýystyrý kerek dep Májilis minberinen naqty usynystar berdik. Biraq Úkimet bul máseleni áli sheshken joq. Máselen, bir áleýmettik pedagog 1500-2000 balamen jumys isteımin deıdi. Osy qyzmeti úshin alatyn aılyǵy qazir 118 myń teńge. 2 jyl buryn talap etkenimdeı áleýmettik pedagogterdi V2 fýnktsıonaldyq blogyna aýystyrsa olardyń aılyǵy 150 myń teńge bolar edi, — dedi depýtat.
Depýtat aıtyp otyrǵan 2023 jylǵy usynysty Úkimet qarjy tapshylyǵyn alǵa tartyp qoldamaǵan kórinedi.
— Úkimet ókiliniń jaýabynan soń resmı eseptettim. 2023-2024 oqý jylynda elimizdiń jalpy memlekettik bilim berý uıymdarynda V3 blogyna jatatyn 113 352 pedagog jumys istep júr. Osy mamandardyń barlyǵyn V3 blogynan V2 blogyna aýystyrsaq, jylyna bıýdjetten shamamen 55 mlrd teńge qosymsha jumsalady eken. Urpaqqa bilim men tárbıe beretin mamandardan aıaıtyn aqsha emes bul. Bul birinshi talap, — dedi Nartaı Sársenǵalıev.
Sondaı-aq ol bilim berý uıymdaryndaǵy eden jýýshy, aýla sypyrýshy, vahter, kir jýǵysh mashınanyń operatory, aspaz, júrgizýshi, elektrık syndy mamandar men tehnıkalyq personaldyń jalaqysy óte az ekenin atap ótti.
— Bilim berý uıymdaryndaǵy tehnıkalyq personal qyzmetkerleriniń jalaqysy 2024 jyly 71%-ǵa, 2025 jyly 100-ǵa ósedi degen resmı málimetti bárimiz bilemiz. Biraq sonyń ózinde atalǵan azamattardyń aılyǵy elimizdegi ortasha jalaqy turmaq medıanalyq jalaqy deńgeıine jetpeıdi. Bul áleýmettik ádiletsizdik, sony joıyp jumysshylardyń jalaqysyn kóterý kerek, — dedi depýtat.
Eske salsaq, Memleket basshysy Qasym-Jomart Toqaevtyń Jarlyǵymen 2025 jyl Jumysshy mamandyqtarynyń jyly dep jarııalandy.