Depýtat ulttyq jobalarda eskerilmegen máseleni aıtty
«Ulttyq jobany qabyldaý – memlekettik josparlaýdyń jańa jáne mańyzdy kezeńi. Bizdiń túsinigimizde josparlaý ekonomıkany damytý jáne qazaqstandyqtardyń ómir súrý sapasyn jaqsartý úshin naqty nátıjege baǵdarlanýǵa tıis. Negizgi mindet – buǵan deıingi memlekettik baǵdarlamalardyń kemshiligi men nysanaly ındıkatorlardyń qateligine jol bermeý. Alaıda biz memlekettik baǵdarlamalardaǵy problemalar ulttyq jobalarda da paıda bolyp jatqanyn kórip otyrmyz», - dedi A. Qońyrov Úkimet basshysy Asqar Mamınniń atyna joldaǵan saýalynda.
Onyń aıtýynsha, saılaýshylardyń basym bóliginde ózderine arnap jazylǵan ulttyq jobalardyń máni týraly túsinik joq. Bul tańqalarlyq jaıt emes, óıtkeni ulttyq jobalar memlekettik baǵdarlamalar sekildi is-sharalar men sandardyń jıyntyǵynan quralǵan. Adamdardyń máselesin sheshý joly kórinis tappaǵan.
«Ekonomıka salasyndaǵy jumys qazaqstandyqtardyń ekonomıkalyq qaýipsizdigin qamtamasyz etýge basymdyq berýge tıis dep sanaımyz. Josparly qujattarda ortasha kórsetkishter emes, túrli salalar men azamattardyń sanattary jáne jumyspen qamtý salalary boıynsha kiristiń qalaı artatyny mindetti túrde kórsetilýge tıis. «Qazaqstandyqtardyń ál-aýqatyn arttyrýǵa baǵyttalǵan ornyqty ekonomıkalyq ósý» ulttyq jobasy mysalynda azamattardyń tabysy qalaı ósip, ómiri qalaı jaqsaratyny naqtylanýy kerek. Ataýynda basymdyq durys berilgen. Alaıda naqty mindet deńgeıinde qaraıtyn bolsaq, onda barlyq qazaqstandyqtardyń ál-aýqatyn «2019 jylǵy deńgeıden naqty aqshalaı kiris kóleminde 27,1% - ǵa ósirý» týraly ǵana mindet qoıylǵan. Nelikten 27,1%? Nege 25% nemese 30% emes? Bul ósimge qalaı qol jetkiziledi? Bul ósimge qol jetkizý barysynda ınflıatsııa esepke alyndy ma? Aqparat joq», - dedi depýtat.
«Qazaqstan Halyq partııasy» fraktsııasy halyq resýrsy men ult bolashaǵyna qatysty máselede memlekettik josparlaýǵa atústi qaraý qaýip tóndiredi dep sanaıdy.
«Ulttyq jobalardy júzege asyratyn salalyq tujyrymdamalardy ázirleý barysynda memlekettik baǵdarlamalarda ketken qatelerge jol bermeý asa mańyzdy. Bul qujattardy sarapshylar men ǵylymı qoǵamdastyq ókilderi tereń taldaýdan ótkizýge tıis. Qujatqa ózgeris engizý úshin talqylaý ashyq bolýy kerek.