Depýtat Ulttyq qor týraly: Biz bolashaqtyń nesibesine qol salyp jatyrmyz

NUR-SULTAN. QazAqparat – Májilis depýtaty Berik Dúısenbınov Parlamenttiń birlesken otyrysynda «aqjoldyqtardyń» Úkimet pen Esep komıtetiniń bıýdjet týraly esebin bekitýden nege bas tartqanyn túsindirdi dep habarlaıdy QazAqparat tilshisi.

«Búgingi bıýdjettiń oryndalýy týraly baıandamalardy baıqasańyz, kóbi synǵa toly boldy. Biraq biz nege qalys qalyp, qalǵandary nege qoldaǵany ózge partııalaryń óz jumystary shyǵar. Bizdiń ustanym aıqyn. Ulttyq qor bir jylda 55 mlrd dollarǵa kemise, qalaı ony qoldaýǵa bolady? Ulttyq qor degen bolashaqtyń nesibesi ǵoı. Biz bolashaqtyń nesibesine qol salyp jatyrmyz. Sondyqtan bıýdjettiń bulaı oryndalýyn biz qoldaı almaımyz», - dedi Májilis ókili.

Depýtat eldegi jekeshelendirý saıasaty men ınvestıtsııalyq jobalardyń bir-birine qaıshy kelip jatqanyn atady.

«Bir qolymyzben pálen mıllıardqa medıtsınalyq obektiler salyp, ekinshi qolymyzben dál sondaı nysandardy óz baǵasynan arzanǵa satyp jatyrmyz. Ony qalaı qoldaýǵa bolady? Ekonomıkalyq aımaqtar dep otyrmyz. Ol aımaqtar tabys ákelip, jumys oryndaryn ashady, elimizge kól-kósir paıda ákeledi dedik. Olardyń qazir ekonomıkadaǵy alatyn róli 0,1 paıyz ǵana. Qanshama qarjy quıyldy?! Jeke taraptardan, jeke azamattardan ınvestıtsııa tartylǵan joq. Búkil kvazımemlekettik sektor salyp otyr. Mundaı kózbaıaýshylyqpen ekonomıkalyq aımaq qurý ne úshin kerek?», - dedi Berik Dúısenbınov.

Aıta keteıik, búgin Parlament Úkimet pen Esep komıtetiniń bıýdjet týraly esebin bekitti.