Depýtat Úkimetke memlekettik bank qurýdy usyndy
Onyń paıymynsha, bul bank aýyl sharýashylyǵy, qurylys jáne ónerkásip salasyna mamandanǵan bolýy kerek.
QR Premer-Mınıstri Álıhan Smaıylovtyń, QR Ulttyq bankiniń tóraǵasy Ǵalymjan Pirmatovtyń jáne QR Qarjy naryǵyn retteý jáne damytý agenttiginiń basshysy Madına Ábilqasymovanyń atyna joldanǵan saýalda eldiń bank salasynda daǵdarys bas kóterip kele jatqany aıtylǵan.
«Qazaqstan halyq partııasynyń fraktsııasy geosaıası sebepter men eldegi bank salasyn basqarýdaǵy álsizdikterdiń kesirinen bank daǵdarysy beleń alyp keledi dep esepteıdi. Dúnıejúzilik saýda uıymyna kirgenimizge qaramastan, reseılik bankterden basqa iri bankter Qazaqstanda jumys isteýge kirgen joq. Qazirgi sanktsııalarǵa da sol reseılik bankterdiń enshiles bankteri tap kelip jatyr. Keıingi bes jylda Qazaqstannyń bank salasynda olarǵa tıesili aktıvterdiń kólemi 15 paıyzǵa deıin ósti. Reseılik enshiles bankterdiń salymdarynyń kólemi 3 trln 500 mlrd teńgege deıin kóbeıdi», - dedi Aıqyn Qońyrov búgin Májilistiń jalpy otyrysynda.
Osy faktorlardy negizge alǵan depýtat birneshe usynys aıtty.
«Biz jahandyq monetarlyq bılik ókilderi Reseı Federatsııasynyń seriktes elderdiń qarjylyq sektoryna salatyn sanktsııalardy qanshalyqty qataıtatynyn bilmeımiz. Qazaqstan osy sanatqa jatady. Osyǵan baılanysty Qazaqstan halyq partııasy bank sektoryn túbegeıli qaıta júkteýge úndeıdi. Salymshylardyń quqyqtary men zańdy múddelerin qorǵaý tásilin túbegeıli ózgertýdi usynamyz. Memlekettik baǵdarlamalar men Ulttyq jobalardy iske asyrý úshin memleket qarajatyn kommertsııalyq bankter men kvazımemlekettik ınstıtýtattar arqyly bólýden bas tartý qajet. Qazaqstanda agroónerkásip kesheni, qurylys jáne ónerkásip salalaryndaǵy memlekettik bank qurýdy usynamyz. Ol banktiń basym baǵyty valıýta bırjasyndaǵy alypsatarlyq pen Ulttyq bank ishinde salym quıý emes, ekonomıkany damytý bolýǵa tıis», - dedi depýtat.
Sondaı-aq Májilistiń búgingi jalpy otyrysynda Balalar jylyn ótkizý josparyndaǵy sharalardyń sanyn azaıtý usynyldy.