Depýtat Temirtaýdaǵy jylý berý nysandaryn jóndeý jumystaryn erekshe baqylaýǵa alýdy surady
«Jaqynda «AMANAT» Fraktsııasy músheleri Temirtaý qalasynyń jylýmen qamtý obektileriniń jaı-kúıimen tanysty. Ekinshi JEO-ny jóndeý jumystary grafıkke sáıkes kelmeıdi. Qazandyq, týrbogeneratorlardy jóndeýge kelisimsharttar jasalmaǵan, basqa da jóndeý jumystary baıaý júrip jatyr. Temirtaýda ornalasqan 1-GRES-ke jóndeý jumystary 2005 jyly jekege ótkennen keıin jasalmaǵan. GRES-te óndiristik qaýipsizdik sharalary múldemge qoldanylmaıdy, bir top depýtat óndiris ornymen tanysqan kezde, dánekerleý jumystary júrip jatqan jerde ottegi ballondary ashyq jatqandyǵynyń kýási boldy», - dedi E. Saırov Bas prokýratýra men Úkimet basshysyniń birinshi orynbasary Roman Sklıardyń atyna joldaǵan saýalynda.
Onyń aıtýynsha, kásiporynda órt qaýipsizdigi is-sharalary men adamdardy óndiristik qorǵaý sharalary júzege asyrylmaǵan.
«Eger GRES-tiń terrıtorııasyna kirseńiz «apokalıpsıs» aımaǵyna ótkendeı sezim alasyz. Buzylǵan ǵımaratty, qısaıǵan murjany, sondaı-aq aınalasy lastanǵanyn baıqaýǵa bolady», - dedi depýtat.
Bul turǵyda ol Temirtaý qalasyndaǵy jylýmen qamtý máselelerin Úkimet baqylaýǵa alý qajet ekenin aıtty.
«Temirtaý 1-GRES-inde qalyptasqan jaǵdaıǵa baılanysty Energetıka, Tótenshe jaǵdaılar mınıstrligi birlesken komıssııa jiberip, eńbek, óndiris qaýipsizdigi máselelerin tekserýi tıis. Ol jerde tehnogendik jaǵdaı bolýy yqtımal. Adamdardyń ómirine naqty qaýip bar.Bas prokýratýra Temirtaý 1-GRES-niń jekeshelenýiniń zańdylyq dárejesin anyqtaı otyryp, tehnogendi turǵydan kásiorynnyń elimizdiń zańdaryn saqtaý dárejesin anyqtaýy ózekti», - dedi E. Saırov.