Depýtat tasqyn sýdan kelgen zalaldy óteý qaǵıdalaryn qaıta qaraýdy usyndy

<p>ASTANA. KAZINFORM &ndash; Tasqyn sýdan zardap shekken óńirlerde qazir zalaldy óteýge birjolǵy kómek tóleýge qujattar qarqyndy túrde qabyldanyp jatyr. Alaıda úıleri sý astynda qalǵan kóptegen turǵyn memleketten tıisti materıaldyq qoldaý bolmaı qalýy múmkin dep alańdap otyr. Bul rette, senator Ásem Rahmetova óziniń depýtattyq saýalynda zardap shekkenderdiń problemalaryn kóterdi.</p>

Zardap shekkendermen kezdesý barysynda qıraǵan nemese sý basqan úılerdegi múlikke qatysty zalaldyń mólsherin dáleldeý keıbir adamdarǵa qıynǵa soǵady degen suraqtar senatorǵa jıi qoıyldy. Óz múlkin resmı tirkep úlgermegender, sondaı-aq saıajaılarda úı salǵandar da qıyn jaǵdaıǵa tap bolǵan.

«Sý basqan eldi mekenderdegi úılerde jalǵa turyp jatqandar memleketten beriletin birjolǵy ótemaqyǵa qol jetkize almaıdy. Esepshottary buǵattalǵan turǵyndarǵa beriletin birjolǵy ótemaqy bankter tarapynan kredıttik qaryzdy jabýǵa ustalyp qalady», - dedi Á. Rahmetova Úkimet basshysy Oljas Bektenovtyń atyna joldaǵan saýalynda.

Depýtat osyǵan baılanysty zalaldy óteý qaǵıdalaryna ózgerister engizýdi, ıaǵnı sý tasqyny kezinde tolyq qıraý nemese joǵaltý sebebinen baǵalaý júrgizý múmkin emes turǵyn úı úshin zalaldy óteý tetigin ázirleýdi, sondaı-aq turǵyn emes qurylystar men múlikke kelgen, onyń ishinde sý tasqyny kezeńinde joǵalǵan múlikti óteý múmkindigin engizýdi usyndy.

«Saıajaı ýchaskelerinde tirkelgen jáne turatyn azamattarǵa kelgen zalaldy óteý tetigin qarastyrýdy, tótenshe jaǵdaı saldarynan zardap shekkenderge kelgen zalaldy óteýge qujattardy berý merzimin 30-dan 60 kúnge deıin qaıta qaraýdy, jeke nemese memlekettik turǵyn úı qorynan jalǵa beriletin úılerde turatyn azamattardyń múlkine kelgen zalaldy óteý tártibin aıqyndaýdy usynamyn. Sondaı-aq tótenshe jaǵdaı kezinde shottary buǵattalǵan zardap shekkender úshin arnaıy shottar ashý múmkindigin qarastyrý mańyzdy», - dedi senator.