Depýtat Talǵardaǵy jasóspirimniń ólimi jaıynda: organdar quqyqtyq baǵasyn tez arada berýi qajet

<p>ASTANA. KAZINFORM &ndash; Májilis depýtaty Nartaı Sársenǵalıev Talǵar aýdanynda 16 jastaǵy azamatty óltirgen qylmyskerlerdi zańǵa sáıkes jazalaýdy talap etti. Osy oraıda ol Bas prokýror Berik Asylovtyń, Іshki ister mınıstri Erjan Sádenovtiń, Oqý-aǵartý mınıstri Ǵanı Beısembaevtyń atyna depýtattyq saýal joldady.</p>

«Jurttyń jaǵasyn ustatqan jaǵdaı Almaty oblysy Talǵar aýdanynda boldy. Qoǵamdy qamyqtyratyny sol, sońǵy ýaqytta jasóspirimderdiń bir-birin aıaýsyz soqqyǵa jyǵýy, qorlaýy, eń soraqysy arty ólimge aparatyn qaıǵyly jaıttar jıilep ketti. Keshe ǵana Talǵardaǵy dúkende bolǵan jaǵdaı esimizdi ekeý, túsimizdi tórteý qyldy. Talǵardaǵy teksizderdiń tentektiginen 16 jasar bala, bir áýlettiń aımańdaı azamaty - Sherzat kóz jumdy. Ákesi men baýyry soqqyǵa jyǵyldy. Balanyń ajalyna ne sebep degen suraq týady. Sondaǵysy - bir bótelke alkogol. Osyndaıda «bizdiń qoǵam qaýipsiz be ózi, zań kimniń jaǵynda?» degen suraq týady. Sebebi, Sherzattyń ákesi tergeýdiń turalap turǵanyn, aýdandaǵy quzyrly oryn ókilderiniń isti sozbaqqa salyp jatqanyn, qylmyskerdi qoıyp balasynan aırylǵan otbasyn túnde tergeýge shaqyryp alyp, óktem sóılegenin aıtyp beıneúndeý jasady. El óre túregeldi, artynsha «isti Іshki ister mınıstri óz baqylaýyna aldy» degen aqparat tarady. Qoǵamdy qorqytatyny osy, qylmyskerdi jazalaý úshin, ádildikke jetý úshin beıneúndeý jasap, ár isti bir mınıstrdiń baqylaýǵa alǵanyn kútip otyrý kerek pe?! Nege jergilikti jerdegi quqyq qorǵaý oryndary dereý istiń aq-qarasyn anyqtap, ádil tergeý ótkizbeıdi?», - dedi N. Sársenǵalıev.

Bul turǵyda depýtat óziniń birneshe usynysyn jarııalady.

Birinshiden, Almaty oblysy Talǵar aýdanynda 16 jasar azamatty óltirgen, jaqyndaryn aıaýsyz sabaǵan qylmyskerler qamaýǵa alynyp, olarǵa zańǵa sáıkes ádil jaza berilýi tıis.

«Ekinshiden, atalǵan is boıynsha barlyq quqyq qorǵaý organdary tize qosyp, oqıǵanyń zańdy quqyqtyq baǵasyn tez arada berýi qajet. Úshinshiden, bilim berý uıymdarynda «Quqyq negizderi» atty pán bar. Biraq onyń sapasyna qatysty syn kóp. Atalǵan pánniń baǵdarlamasyn qaıta jasap, balalar ómirde betpe-bet keletin jaıttar men ómirden alynǵan naqty keısterge súıenip oqytý kerek. Tórtinshiden, Memleket basshysy usynǵan Zań men Tártip qaǵıdatyna súıene otyryp, eldegi quqyq qorǵaý júıesine, polıtsııaǵa degen halyq senimin kúsheıtý, qoǵam kózqarasyn ózgertý boıynsha jalpymemlekettik deńgeıde keshendi sharalar qabyldaý qajet», - dedi ol.

Eske salaıyq, buǵan deıin 4 qazan kúni Talǵar qalasyndaǵy tóbelesten jasóspirim qaıtys bolǵanyn jazǵanbyz.

Almaty oblysynyń Polıtsııa departamenti Talǵar qalasynda 16 jastaǵy jasópirimniń ólimine qatysy bar kúdiktilerdiń Qonaev qalasyna jetkizilgenin habarlady.

Іshki ister mınıstri Talǵardaǵy jasóspirimniń ólimine qatysty isti baqylaýǵa aldy.