Depýtat: Sýdıalar saılanatyn bolsa, Saryaǵashtaǵy qyz pedofıldiń qolynan ólmes edi

<p>Májilis depýtaty, zańger Abzal Quspan Ádilet mınıstrligi uıymdastyrǵan halyqaralyq konferentsııa aldynda BAQ ókilderine sýdıalardyń halyq aldyndaǵy jaýapkershiligi týraly pikir bildirdi, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

«Saryaǵashtaǵy rezonansty oqıǵa esińizde shyǵar, ol jerde sot buryn aýyr qylmys jasaǵan adamǵa óte jeńil jaza taǵaıyndaǵannyń kesirinen jan túrshiktiretin qylmys tirkeldi ǵoı. Mundaı jaıttar qaıtalanbaý úshin ne isteý kerek?» dep surady BAQ ókili.

Depýtat bul elimizde «sot táýelsizdigi» degen uǵymnyń teris burmalanyp ketýine baılanysty ekenin aıtty.

«Ol endi zańnyń jergilikti orynda teris oryndalýynyń saldary. Bul jerde taǵy bir másele bar. Sýdıalardyń táýelsizdigin qamtamasyz etemiz dedik te, halyqtyń aldyndaǵy jaýapkershiligin joıyp tastadyq. Túsinikti bolý úshin aıtaıyn. Mysaly, Amerıkanyń kóptegen shtatynda sýdıalar qyzmetke saılaý arqyly keledi. Sondyqtan halyqtyń aldynda belgili bir deńgeıde jaýapty bolady. Qazir bizdegi sýdıalar absolıýtti túrde eshkimniń aldynda jaýap bermeıdi. Olar adamdardy qabyldamaıdy da. Mysaly, atqarýshy bılik ókilderi jyl saıyn halyq aldynda esep berip, azamattardy jeke máselesi boıynsha qabyldaýǵa mindettelgen. Zań shyǵarýshy bılik saılaý arqyly jasaqtalady. Al sot bıligi absolıýtti táýelsiz bolyp ketti. Bul da belgili bir dárejede durys emes dep oılaımyn. Halyqtyń osyndaı bir erekshe narazylyǵy týyndaǵan kezde ǵana, qoǵamnyń ashý-yzasy kemerine jetkende ǵana áreketter jasalady. Negizi bul durys emes», - deıdi zańger.

Májilis depýtaty sot bıligin halyq aldynda jaýapty etý máselesin sala ókilderi qabyldaǵysy kelmeıtinin de aıtyp qaldy.

«Ázirge bul týraly áńgime qozǵaý erterek shyǵar. Biraq óz basym Májilistegi zańnama jáne sot-quqyqtyq reforma komıtetiniń múshesi retinde osy máseleni kóterip júrmin. Sýdıalardyń halyq aldynda belgili bir dárejede jaýapkershiligi bolýy kerek dep esepteımin. Bara-bara sýdıalardy saılaıtyn kúnge de jetermiz. Dál qazir ony talqylamaq túgil estigisi kelmeıdi de. Shyndyq sondaı», - dedi Abzal Quspan.