Depýtat «Serpin» baǵdarlamasynyń tıimdiligi úshin jańa poıyz baǵdarlaryn ashýdy usyndy

NUR-SULTAN. QazAqparat – Búgin Májilistiń jalpy otyrysynda depýtat Fahrıddın Qarataev elimizdiń ońtústigi men soltústik óńirleriniń arasyn jalǵaıtyn temirjol kóligine qatysty máseleni kóterdi. Osy oraıda Úkimet basshysynyń birinshi orynbasary Roman Sklıardyń atyna saýal joldady, dep habarlaıdy QazAqparat tilshisi.

«Bizdiń depýtattyq saýalymyzǵa 2014 jyldan beri iske asyrylyp kele jatqan «Máńgilik El jastary – ındýstrııaǵa!» - «Serpin – 2050» áleýmettik jobasyn iske asyrý maqsatynda halyqtyń ońtústik óńirinen jumys kúshi tapshy soltústik óńirine qonys aýdarý kezinde tikeleı temir jol baǵdarynyń bolmaýyna baılanysty qatynaý, kóshý týraly kúrdeli máselesi sebep bolyp otyr. Atap aıtsaq, atajurtqa oralǵan qandastar kóshin soltústikke burý, elimizdegi jumys kúshi artyq óńirlerdiń turǵyndaryn erikti qonys aýdarý, «Serpin» memlekettik baǵdarlamasy boıynsha ońtústik óńirleriniń jastaryn oqýǵa jiberý syndy ıgi ister atqarylýda. Bul baǵdarlama óńirlerdiń yntymaqtastyǵyn, olardyń turǵyndarynyń ózara qarym-qatynasyn kúsheıtip, tutastaı alǵanda, halqymyzdyń birligin nyǵaıtýǵa da oń yqpalyn tıgizip otyrǵandyǵy anyq», - dedi Fahrıddın Qarataev

Osy oraıda ol qazaqstandyqtardyń basym bóligi temirjol tasymaly qyzmetin paıdalanatynyn eske saldy.

«Onyń sebebi poıyz qaýipsiz kólik ekendigine, marshrýty men júrip-turý kestesiniń yńǵaılylyǵyna jáne bılet qunynyń qoljetimdiligina baılanysty. Degenmen de, sheshimin tappaı otyrǵan másele - ol soltústiktegi Qostanaı, Pavlodar óńirine qonys aýdaryp jatqan halyqtyń qatynaýy óte qıyn. Ásirese kóshken jastardyń ata-analary, qarttary, balalarymen, júkterimen júrý qıynǵa soǵýda. Mysaly halyq Túrkistan oblysynan Qostanaı aýmaǵyna deıin qatynaý úshin Almaty, Qaraǵandy nemese Nur-Sultan qalalary arqyly poıyzdardyń ýaqyttary bir-birine sáıkes kelmeı jarty kún, keıde bir kún kútýge týra keledi. Tipti keıbiri jeńil kólik taksı jaldap barýǵa májbúr, bul óte ózekti jáne kezek kúttirmes úlken máselege aınalyp otyr», - dedi depýtat.

«Joǵarydaǵy jaǵdaılardy túsinistikpen qaraı otyryp, halyqtyń máselesiniń ózektiligin jan-jaqty qarastyryp, jolaýshylarǵa múmkindiginshe jaǵdaı jasap, «Serpin» baǵdarlamasynyń tıimdiligin arttyrý maqsatynda «Qyzylorda - Túrkistan - Shymkent – Jambyl, Qostanaı» baǵytyndaǵy jolaýshylar poıyzynyń ashylýyna yqpal etýdi suraımyz», - dedi ol.