Depýtat Saraıshyq kóshesine Jumabek Táshenovtyń atyn berýdi usyndy

<p>ASTANA. KAZINFORM &mdash; Astana qalasynyń máslıhaty altynshy aýdandy Saraıshyq dep ataýdy maquldady. Bul rette máslıhat depýtaty Baýyrjan Smaılov sol jaǵalaýdaǵy Saraıshyq kóshesiniń ataýyn Jumabek Táshenov dep aýystyrýdy usyndy.&nbsp;</p>

Buǵan deıin depýtat jańa aýdanǵa Jumabek Táshenov esimin berýdi usynǵan eken. 

«Buǵan deıin de Almaty aýdany quryldy, Almaty kóshesi boldy, Saryarqa aýdany men Saryarqa dańǵyly bar. Ózge óńirlerde de qaıtalanatyn ataýlar bar. Sondyqtan bul másele (kóshe atyn aýystyrý — red.) kún tártibinde turǵan joq. Saraıshyqtyń saıası-ıdeıalyq mańyzdylyǵyn eskere otyryp, jańa aýdan ataýy retinde tańdadyq. Onomastıka zańdylyǵy boıynsha kisi esimi eldimekenge, aýdanǵa, qalaǵa berilmeıdi», — dep jaýap berdi Astana tilderdi damytý jáne arhıv isi basqarmasynyń basshysy Sáken Esirkep. 

Foto: Vıktor Fedıýnın/ Kazinform

Sáken Esirkep elordada J. Táshenov atyndaǵy kóshe men mektep bar ekenin, mektepte mýzeı men eskertkishi ashylǵanyn eske saldy. 

Al depýtat bir qalaǵa Saraıshyq ataýy kóbeıip ketkenin, sondyqtan qazirgi Saraıshyq kóshesin Táshenov esimine aýystyrý bastamasyn kóterdi. 

«Eger Saraıshyq aýdany ashylsa, Qonaev kóshesimen qatar jatqan Saraıshyq kóshesine Jumabek Táshenovtyń esimin bereıik. Oń jaǵalaýdaǵy qazirgi Táshenov kóshesi óte qysqa. Mundaı tulǵaǵa sol jaǵalaýda naqty Saraıshyq kóshesi berilse, ádildik sonda bolady», — dedi máslıhat depýtaty Baýyrjan Smaılov.