Depýtat sanıtarııalyq-epıdemıologııalyq qyzmettegi kemshilikter týraly aıtty
«Biz pandemııa jaǵdaıynda Sanıtarııalyq-epıdemıologııalyq qyzmet (SES) róliniń mańyzdylyǵyna taǵy da kóz jetkizdik, óıtkeni bul qyzmet ómirdiń barlyq salalaryna tikeleı áser etetin halyqtyń sanıtarııalyq-epıdemıologııalyq ál-aýqatyna jaýap beredi. Alaıda, qatań karantın jaǵdaıynda qabyldanyp jatqan sharalarǵa qaramastan, salanyń júıelik problemalary kesheni anyqtaldy. Búgingi tańda sanepıdqyzmet eskertý qadaǵalaýyn qamtamasyz etý fýnktsııasyn joǵaltty, onyń búkil qyzmeti tek aǵymdaǵy qadaǵalaýǵa baǵyttalǵan. Onyń tıimsizdigi óziniń tartymdylyǵyn da, táýelsizdigin de joǵaltýǵa ákeldi. Sonymen qatar, osy salany qaldyq qarjylandyrý jáne birneshe ret reformalaý onyń aqyryn «joıylýyna» alyp keledi», - dedi J. Nurmanbetova.
Onyń aıtýynsha, asa qaýipti ınfektsııalardyń jyl saıynǵy órshýi SES qyzmetinen jedel den qoıýdy, ınfektsııalyq aýrýlar qozdyrǵyshtarynyń túrlerin anyqtaýdy jáne olardy joıýdy talap etedi. Búgingi tańda epıdemıologııalyq qadaǵalaýdyń biryńǵaı elektrondyq júıesiniń bolmaýy azamattardyń densaýlyq jaǵdaıy, ınfektsııanyń berilý múmkindigi jáne ınfektsııalyq aýrýlardyń oshaqtaryn anyqtaý týraly anyq aqparatqa jedel qanyq bolýǵa múmkindik bermeıdi. Bul óz kezeginde epıdemıologııalyq ahýaldy boljaýǵa jáne baǵalaýǵa áser etedi.
«Budan basqa, sanıtarııalyq-epıdemıologııalyq qadaǵalaýdy júrgizýdiń ashyq bolmaýy sybaılas jemqorlyq táýekelderiniń kórinisine negiz bolady. Máselen, sybaılas jemqorlyqqa qarsy qyzmettiń derekteri boıynsha sońǵy 3 jylda 59 sybaılas jemqorlyq qylmys tirkelgen. Osyǵan baılanysty, qysqa merzimde «Sanıtarııalyq-epıdemıologııalyq qadaǵalaý» biryńǵaı aqparattyq júıesin endirý qajet dep paıymdaımyz. Sońǵy 5-7 jylda qyzmetten joǵary bilikti mamandardyń ketýine jol berý de ótkir problema bolyp otyr, bul tutastaı alǵanda, qyzmettiń kadr quramynyń biliktiligine áserin tıgizdi», - dedi depýtat.