Senator: Otbasyndaǵy zorlyq-zombylyqpen kúres salasynda baqylaýdy kúsheıtý kerek

<p>Otbasyndaǵy zorlyq-zombylyqpen kúres baǵytyndaǵy zańdardyń oryndalýyna qatań baqylaý jasalýy kerek. Bul týraly senator Janna Asanova aıtty, dep habarlaıdy Kazinform.</p>

Depýtattyń sózine qaraǵanda, jańalyqtarda kún saıyn zorlyq-zombylyq pen qorlyq kórsetý týraly aıtylyp jatyr. Al ýákiletti tulǵalardyń nemquraıly kózqarasy men sybaılas jemqorlyq bul máseleni tolyq sheshýge múmkindik bermeı keledi.

Senator mundaı zorlyq-zombylyqqa qarsy is-qımyl keshendi tásildi talap etedi dep sanaıdy. Onyń ishinde jaǵdaıdy erte anyqtaý jáne oǵan aralasý úshin aldyn alý sharalary, sondaı-aq strategııa men tásil-amaldardy ýaqtyly túzetý úshin memleket qabyldaıtyn sharalardyń tıimdiligin júıeli baǵalaý da bar.

«Іshki ister mınıstrliginde turmystaǵy zorlyq-zombylyqqa qarsy is-qımyl jónindegi jeke qyzmetti óńirlik ókildikterge deıin keńeıtý usynylyp otyr. Jalpyǵa birdeı qabyldanǵan halyqaralyq standarttar men psıhologııalyq normalardy eskere otyryp, quqyq qorǵaý organdarynyń alǵash ret shaǵymdanǵan zorlyq-zombylyq qurbandaryna arnalǵan ózara is-qımyl boıynsha nusqaýlyǵyn zańnamalyq turǵydan bekitý kerek. Budan bólek, zorlyq jasaǵandardy mindetti túrde tirkeýge alý, odan keıin memlekettik jáne kúshtik organdarǵa jumysqa ornalasýdy shekteı otyryp, qarý ıelený quqyqtaryna tyıym salýdy engizý mańyzdy», - dedi J. Asanova Úkimet basshysy Álıhan Smaıylovtyń atyna joldaǵan saýalynda.

Depýtattyń usynysynda bilim berý, medıtsına jáne áleýmettik qoldaý salasyndaǵy zańnamanyń birqatar normasyn ózgertý jónindegi sharalar da qamtylǵan.