Depýtat ormanshylardyń jalaqysyn eki ese kóterýdi usyndy

ASTANA. QazAqparat - Elimizdegi dala órtiniń jaǵdaıy óte kúrdeli deńgeıge jetti. Senator Aıgúl Qapbarova osyǵan baılanysty Premer-Mınıstr Álıhan Smaıylovtyń atyna joldaǵan depýtattyq saýalynda orman sharýashylyǵy salasyn saqtaý jóninde birqatar usynys aıtty, dep habarlaıdy QazAqparat tilshisi.

Senator órt qaýpi bar jaǵdaı kezinde ormanshylar tap bolatyn negizgi máselelerge nazar aýdardy. Olardyń qatarynda sý tsısternasy bar avtokóliktiń tym alys bolýyna baılanysty órt oshaǵyna ýaqytynda jete almaýy, qazirgi zamanǵy áýe quraldarynyń bolmaýy, qyzmettik kólikpen, arnaıy kıimmen jáne basqa da jabdyqtarmen tıisti deńgeıde qamtamasyz etilmeýi máselesi bar.

«Eger biz Qazaqstannyń tabıǵatyn saqtap qalǵymyz kelse, ormanshylardyń jaǵdaıyn jaqsartýymyz kerek», - dedi Aıgúl Qapbarova.

Sonymen qatar, senator qazirgi qyzmetkerlerdiń zeınetke shyǵýyna baılanysty bilikti orman sharýashylyǵy qyzmetkerleriniń sany jyl saıyn azaıyp bara jatqanyn, al jastar jalaqynyń tómendigine baılanysty olardyń ornyna kelgisi kelmeıtinin atap ótti.

«Birneshe jyldan keıin bul salada mamandar múldem qalmaýy múmkin. Orman jáne tabıǵat qorǵaý mekemeleriniń materıaldyq-tehnıkalyq bazasyn jańartý jáne olardy normatıvterge sáıkes aldaǵy úsh jyl ishinde 100% qamtamasyz etýdi, orman sharýashylyǵy salasyndaǵy kadr tapshylyǵy oryn almaýy úshin orman mekemeleri men erekshe qorǵalatyn tabıǵı aýmaqtar qyzmetkerleriniń jalaqysyn kem degende eki esege arttyrýdy kózdeıtin keshendi sharalar qabyldaýdy suraımyz», - dedi senator.