Depýtat mınıstrge saýal joldady: áskerı bólimderdegi 50 myń beınekameranyń jazbasy qaıda?
«Sońǵy úsh jylda Qazaqstanda 270 áskerı qyzmetker qaıtys bolǵan, al sońǵy tórt jylda áskerde 86 sýıtsıd tirkelgen, 20 áskerı adam óz-ózine qol salýǵa oqtalǵan. Bul – áskerı prokýratýra málimdegen resmı san. 2023 jylǵy tamyzda áskerı bólimshelerdiń birinde komandır áskerge jańadan kelgen sarbazdy oryndyqpen uryp, soqqyǵa jyqqan. 2024 jyldyń maýsym aıynda Jambyl oblysynyń bir áskerı bólimshesinde áskerge kelgenine 1 aı bolǵan sarbaz es-tússiz jansaqtaý bólimine túsken. Al taıaýda bolǵan jaǵdaı búkil otandasymyzdyń ashý-yzasyn týǵyzdy. Ulttyq ulannyń jaýyngeri Erbaıan Muhtar basynan alǵan jarasynan bes aı boıy es-tússiz jatty. Jaýaptylar «Erbaıan dárethanaǵa qulap, jaraqattandy» deıdi. Buǵan kim senedi? Jaraqattyń saldarynan sarbazdyń basynyń jartysyn alyp tastaýǵa týra kelgen. Endi oǵan turaqty kútim qajet. 7 qyrkúıek kúni Aqtaýdaǵy gornızonda sarbaz Marat Barqulov esimdi baýyrymyz kóz jumdy. Ony ofıtser atyp jibergen. Bul qasaqana jasalǵan áreket, joq pa? Atalǵan suraqtyń jaýabyn tergeý oryndary ádil zerttep, nátıjesin qoǵamǵa ashyq túrde jetkizýi kerek», - dedi N.Sársenǵalıev Qorǵanys mınıstri Rýslan Jaqsylyqovtyń atyna joldaǵan saýalynda.
Sonymen qatar ol áskerı qyzmetkerlerdiń áleýmettik jaǵdaıyna qatysty pikir aıtty.
«Byltyr Qorǵanys mınıstrligi áskerı bólimderde 50 myńnan astam beınekamera bar dedi. Ondaǵy jazbalar qaıda? Álde Erbaıan sekildi baýyrlarymyz jaraqat alǵanda álgi kameralar teris qarap qaldy ma? Áskerdegi álimjettik máselesin AMANAT partııasy 2022 jyly kótergen bolatyn. Alaıda jaǵdaı túzelmek túgili, ýshyǵyp ketti dese de bolady. Sarbazdardyń armııada jaraqat alyp, qaıtys bolýy toqtar emes. Osy tusta taǵy bir túıtkil bar, áskerı qyzmetkerlerdiń áleýmettik jaǵdaıy tómen. Olardyń aılyǵy shaılyǵyna jetpeıdi, sebebi sońǵy ret áskerılerdiń jalaqysy 2008 jyly ǵana kóterilgen. Ýaǵynda berilgen áleýmettik qoldaý sharalarynyń birazynan shet qalǵan. Bul jaǵdaıdy túzetý kezek kúttirmeıtin másele», - dedi depýtat.
Bul turǵyda N.Sársenǵalıev birneshe usynysyn jarııalady. Birinshiden, elimizdiń armııasyndaǵy atalǵan keleńsizdikti tyıý jáne onyń aldyn alý boıynsha naqty sharalar qabyldaý usynyldy. Munymen qosa, áskerılerdiń áleýmettik jaǵdaıyn jaqsartýǵa baǵyttalǵan is-áreketterdi kúsheıtý kerek ekeni atap ótildi.
Eske sala ketsek, Ulttyq ulan bólimshesinde merzimdi áskerı qyzmet atqarǵan Erbaıan Muhtardyń komaǵa túsýine janama aýrýlar sebep bolǵany aıtylǵan edi.
Buǵan deıin komada bolǵan sarbazdyń ákesi qazir Erbaıannyń densaýlyq jaǵdaıy shetelge aparýǵa jaramaı turǵanyn aıtty.
Sondaı-aq, nemis dárigerleri sarbazdyń aıaǵynan turýyna 80-85% múmkindigi baryna úmittenip otyr.
Aıta ketsek, 7 qyrkúıekte Aqtaý qalasyndaǵy QR QM áskerı bólimderiniń birinde sarbazǵa oq tıip, qaıtys boldy. Batys óńirlik áskerı-tergeý basqarmasy qasaqana kisi óltirý faktisi boıynsha sotqa deıingi tergeýdi bastady.