Depýtat mekteptiń áskerı daıyndyq pánine arnaıy kıim talap etýge tyıym salýdy usyndy
«Mektep formasy Bilim jáne ǵylym mınıstriniń 2016 jylǵy 14 qańtardaǵy «Orta bilim berýdegi kıim úlgisine qoıylatyn mindetti talaptardy bekitý» týraly buıryǵymen reglamentteledi. Onda mektep formasy kúndelikti kıim úlgisi, merekelik jáne sporttyq kıim úlgisi bolyp bólingen. Al jalpy orta bilim beretin mektepterdegi alǵashqy áskerı daıyndyq pánine 10-11 synyp oqýshylary jınaqy kıim kıip kelýi mindetteledi. Degenmen, erejege sáıkes osy pán oqytýshysy sabaq bastalmas buryn oqý toptaryna nemese vzvodqa qandaı kıim kıetinderi týraly habarlaýy kerek. ıAǵnı, oqytýshy oqýshylardyń qandaı kıimmen keletinin ózi aıqyndaıdy», - dedi depýtat Aıqyn Qońyrov.
Onyń aıtýynsha, sońǵy ýaqytta ata-analar 10-11 synyp pen kolledj oqýshylary alǵashqy áskerı daıyndyq pánine arnaıy kıim talap etiletinin aıtyp shyǵamdanǵan. Al bundaı arnaıy kıimder jıynyn satyp alý 20-30 myń teńgeden asady.
«Bul otbasylyq bıýdjet úshin aıtarlyqtaı salmaq. Onyń ústine ata-analar qystyń kúni áskerı oqýǵa qatysty qystyq kıim úlgileri de talap etile me dep alańdaıdy. Onyń baǵasy joǵaryda aıtylǵannan 2-3 esege qymbat shyǵady. Osyǵan baılanysty orta mektepterde alǵashqy áskerı daıyndyq sabaǵyna arnaıy kıim úlgisin talap etýge tyıym salý kerek dep sanaımyz. Oqýshylardyń bul sabaqqa kúndelikti nemese sporttyq kıim úlgisin kıip qatysýlaryna erkindik berilýi tıis. Olaı bolmaǵan jaǵdaıda bul kıim úlgisin alýdy Qorǵanys mınıstrliginen arnaıy qarajat bólý arqyly qamtamasyz etý qajet dep sanaımyz», - dedi Aıqyn Qońyrov.