Depýtat Maqsat Tolyqbaı temirjol salasyn synǵa aldy

<p>Búgin Májilistiń jalpy otyrysynda depýtat Maqsat Tolyqbaev temirjol salasyndaǵy problemany kóterip, &laquo;Qazaqstan temir joly&raquo; kompanııasynyń basshylyǵyn synǵa aldy, dep habarlaıdy Kazinform.&nbsp;</p>

«Temirjolda qashan tártip ornaıdy? Burynǵy basshylar 30 jylda temirjoldy tek tabys kózine ǵana aınaldyrǵan. Eski Qazaqstannyń ókilderi osy salanyń sólin soryp, bizge tek qańqasyn ǵana qaldyrdy. Bul salada sapa múldem tómen. Eski vagondar súıretilip áli júr, temirjol parkiniń 60 paıyzy tozǵan. Terezesi ashylmaıtyn, kondıtsıoneri qosylmaıtyn, qabyrǵasynda taraqandar órmelep júretin eski vagondardyń ózine jaz kezinde bılet tappaısyń. Sóıte tura, bıletti sýbsıdııalaýǵa jyl saıyn mıllıardtardy sanap beremiz. Poıyzdyń jıi keshigýi bólek másele», - dedi M. Tolyqbaı. 

Óz kezeginde Kólik mınıstri Marat Qarabaev el boıynsha 2 567 vagon bar ekenin aıtty. 

«Olardyń tozý deńgeıi - 49 paıyz. Bıyl 50 jańa vagon aldyq. Qol qoıylǵan kelisimshart aıasynda keler jyly taǵy 100 vagon bolady. Qosymsha 157 vagon alý kelisimin pysyqtap jatyrmyz. Sonda, bıyl jáne aldaǵy jylda 300-den astam jańa vagon qosylady», - dedi M. Qarabaev. 

Mınıstrdiń aıtýynsha, qol qoıylǵan taǵy bir shart boıynsha 2025 jyldan bastap Eýropadaǵy eń zamanaýı Stadler kompanııasynyń jalpy sany 537 vagonyn alý josparlanǵan.

«Bul turǵyda 2 567 vagonnyń ústine 804-ten astam jańa vagon alýǵa qazir qol qoıylyp otyr. Qosymsha vagon alý máselesin áli pysyqtaımyz», - dedi M. Qarabaev.