Depýtat magıstral jelilerin jańǵyrtýǵa bólingen qarajatty tekserýdi surady

ASTANA. QazAqparat - Májilis depýtaty Erlan Saırov magıstral jelileri men jylý elektr ortalyqtaryn jańǵyrtýǵa bólingen qarajattyń maqsaty boıynsha ıgerilýin tekserýge shaqyrdy, dep habarlaıdy QazAqparat tilshisi.

Osy oraıda elimizde magıstral jelilerin jańartýǵa bıýdjetten qomaqty qarajat bólingeni aıtyldy.

«Bul qarajat osy olıgarhııalyq toptardyń ókilderine de bólindi. Sondyqtan Bas prokýratýradan atalǵan halyq qarajatynyń qanshalyqty maqsatty jumsalǵanyn tekserýdi suradym», — dedi Erlan Saırov.

Osy oraıda tilshiler «bul qarajattyń maqsatsyz paıdalaný faktileri anyqtaldy ma?» degen suraq qoıdy.

«Bul másele quqyq qorǵaý organdarynyń quzyrynda. Olar zań buzý derekterin anyqtap jatsa, ony jarııalaıtyn bolady», - dedi depýtat.

Budan buryn habarlanǵandaı, Erlan Saırov olıgarhtar jylý elektr ortalyǵyn qaıtarý kezinde barlyq shyǵyndy óteýi tıis ekenin aıtty.