Depýtat kúnbaǵys maıyn óńdeıtin zaýyttardyń kemshiligin atady

ASTANA. QazAqparat – Májilis depýtaty Bekqalı Torǵaev elimizde kúnbaǵys maı óńdeıtin zaýyttardyń kemshiligin atady. Osy oraıda Úkimet basshysy Álıhan Smaıylovtyń atyna saýal joldady, dep habarlaıdy QazAqparat tilshisi.

«2023 jyldyń qańtarynan bastap kúshine enetin kúnbaǵys tuqymyn eksporttaýǵa baj salyǵyn engizý máselesine sizdiń nazaryńyzdy aýdaramyz. Bul sheshimdi qabyldaý kúnbaǵys tuqymynyń jahandyq tapshylyǵyna, sonyń ishinde qazirgi geosaıası jaǵdaıǵa baılanysty. Sonymen qatar Premer-Mınıstrdiń orynbasary–Saýda jáne ıntegratsııa mınıstriniń ustanymyna súıensek, atalǵan shekteý otandyq maı óńdeý zaýyttaryn júktep, joǵary sapaly taýarlardy eksporttaý qajetine qatysty. Alaıda, bul sheshim boıynsha fermerler narazylyq bildirip otyr. Máselen, Qazaqstanda kúnbaǵys maıynyń óndirisi jyl saıyn artyp keledi. Biraq 2017 jyldan bastap tazartylmaǵan maı óndirý kólemi eki esege jýyq ósti. Maı óńdeý zaýyttary ónimdi tereń óńdeý tehnologııalaryna ınvestıtsııa salmaıdy, onyń ornyna is júzinde aıtarlyqtaı qosymsha quny joq bastapqy óńdeýdi ǵana paıdalanady», -dedi B. Torǵaev Májilistiń jalpy otyrysynda.

Onyń aıtýynsha, qazirgi kezde kásiporyndar tek bastapqy óńdeýdi ıgergen. Ónimniń basym bóligin Qytaı men jaqyn ornalasqan elderdiń naryǵyna jóneltý úrdisi baıqalyp otyr.

«Sondyqtan Qazaqstandaǵy sóreler 80%-ǵa deıin ımporttyq ónimdermen, sonyń ishinde kúnbaǵys maıymen toltyrylǵan. 2021-2022 jyldary kúnbaǵysqa engizilgen eksporttyq shekteýler kútken nátıje bermedi. Qazaqstanda azyq-túlik baǵasy eki ese ósken. Sonymen birge kúnbaǵys tuqymyn eksporttaýǵa baj salyǵyn engizý týraly sheshim qabyldanǵan kezde, fermerlerdiń jáne olardyń birlestikteriniń pikiri men dálelderi tyńdalmady. Shekteýler fermerlerge tikeleı ekonomıkalyq shyǵyn keltirip otyr. Bul keıinnen egin sharýashylyǵy sektorynyń jáne jalpy aýyldyń damýyna áser etedi», - dedi depýtat.

Onyń paıymynsha, atalǵan baj salyǵyna qatysty salmaqty sheshim qabyldaý úshin jan-jaqty, tııanaqty jumys júrgizý kerek.

«Bul máseleni jan-jaqty qarastyrý qajet. Ekinshiden, ortalyq jáne jergilikti memlekettik organdardyń, mamandandyrylǵan uıymdardyń qatysýymen jan-jaqty talqylaý júrgizý kerek. Jańa usynystar ázirleý úshin fermerler men eginshilermen jeke kezdesý uıymdastyrýyńyzdy suraımyz. Úshinshiden, otandyq maı óńdeý kásiporyndaryn júkteý úshin Azyq-túlik korporatsııasynyń, ÁKK-lerdiń qoldanystaǵy quraldaryn paıdalana otyryp, is-sharalardy júzege asyrýdyń balamaly tetigin ázirleý qajet», - dedi depýtat.

Budan buryn habarlanǵandaı, Qazaqstan kúnbaǵysqa eksporttyq kedendik baj salyǵyn engizý týraly sheshim qabyldady.