Depýtat Qojanazarov fermerlerdi shetel dempınginen qalaı qorǵaýǵa bolatynyn aıtty

ASTANA. QazAqparat – Májilis depýtaty Aıdarbek Qojanazarov Qazaqstannyń fermerlerin astyq pen sút ónimderin jetkizýshi sheteldik kompanııalar jasap otyrǵan zańsyz ımport pen dempıngten qorǵaý kerektigin málim etti, dep habarlaıdy QazAqparat tilshisi.

«2022 jyly Reseıdegi astyq ónimi rekordty 153 mln tonnany qurady. 2023 jylǵy 1 qańtardaǵy jaǵdaı boıynsha Reseıdiń qorynda byltyrǵa qaraǵanda 44 paıyz kóp saqtalǵan. Kontrabanda kóp jaǵdaıda esebi júrmeıtin, qujaty joq avtokólikpen tasymaldanǵan. Bıdaıdy avtomobıl kóligimen ákelýge tyıym salý týraly jaqynda kúshine engen sheshim tym kesh qabyldandy. Sebebi elge zańsyz jetkizilgen astyq kólemi 2 mln tonnadan artyq. Nátıjesinde elimizge keltirilgen zalal somasy 63 mlrd teńgeden asyp otyr. Bul tek qosymsha qun salyǵy men QTJ tarıfine qatysty. Al feremerler shyǵynyn eseptegen adam bar ma?», - dedi A. Qojanazarov Úkimet basshysy Álıhan Smaıylovtyń atyna joldaǵan saýalynda.

Sonymen qatar ol elimizdegi sút óndirýshilerdiń de jaǵdaıy qıyndaǵanyn aıtty.

«Qazir Reseıde qurǵaq súttiń profıtsıti bar. Ózge naryqtyń bolmaýy sebebinen, reseılik óndirýshiler óz ónimderimen Qazaqstannyń saýda jelilerin toltyryp jatyr. Al otandyq óndirýshiler qıyn jaǵdaıǵa tap bolyp otyr. Bul máseleni jedel sheshý kerek», - dedi depýtat.

Osy oraıda ol Astyq naryǵynda «Alashańqaı» arqyly («Dostyq (QR) – Alashańqaı (QHR)» shekara ótkeli) bıdaı men un tasymaldaýǵa qatysty barlyq kedergini joıý kerek ekenin aıtty.

«Ol úshin elimiz Úkimeti Qytaı jaǵymen kelissóz júrgizýi tıis. Astyq pen undy ótkizý naryǵyn Taıaý Shyǵys, Iranǵa qaraı keńeıtý qajet. Memlekettik qorǵa kem degende 1 mln tonna kólemde astyq satyp alý kerek. Egin egý naýqany toqtaýsyz júrý úshin fermerlerdiń qaryzyn qaıta qurylymdaý quraldaryn qarastyrǵan jón», - dedi Aıdarbek Qojanazarov.

Onyń sózine qaraǵanda, ımporttalatyn sút ónimderiniń kiris baǵasyna tolyq taldaý júrgizý mańyzdy.

«Kontrabanda jolymen ákelýge jol bermeý baǵytynda shekarada baqylaýdy kúsheıtý kerek. Otandyq ónim óndirýshiler úshin «Qazaqstanda jasalǵan» tańbasyn barlyq jerde paıdalana otyryp, jergilikti taýarlar boıynsha saýda jelilerinde barynsha tıimdi oryndar men sórelerdi basym tártippen usyný qajet», - dedi depýtat.

Budan buryn habarlanǵanda, Aýyl sharýashylyǵy mınıstriniń «QR aýmaǵyna bıdaıdy avtomobıl kóligimen ákelýge tyıym salýdy engizý týraly» buıyryǵy kúshine endi.