Depýtat qorǵanys jabdyqtaryn synaqtan ótkizetin zerthanalar qurýdy usyndy

ASTANA. QazAqparat - Otandyq qarý-jaraq, dýlyǵa jáne qorǵanys qalqandaryn óndirýshiler óz ónimderin synaqtan ótkize almaı otyr. Bul týraly senator Janna Asanova aıtty, dep habarlaıdy QazAqparat tilshisi.

Onyń aıtýynsha, Qazaqstanda atys synaqtaryn júrgizýge arnalǵan tirkelgen zerthana men óndirilgen jabdyqtardyń memlekettik standarttar talaptaryna sáıkestigin sertıfıkattaý jónindegi organdar joq.

Ol óziniń depýtattyq saýalynda tıisti zerthananyń bolmaýyna baılanysty áskerı qyzmetshilerge jeke qorǵanys quraldaryn daıyndaý talaptaryn belgileıtin ulttyq standart paıdalanylmaı otyrǵanyn aıtty. Memlekettik organdar memlekettik satyp alý kezinde reseılik uqsas standartty nazarǵa alyp keledi.

Sonymen qatar, kúsh qurylymdardy qorǵanys quraldarymen jabdyqtaý áskerı qyzmetshilerdiń ómiri men densaýlyǵyn saqtaý máselesimen tikeleı baılanysty. Senator osy jaǵdaıdy jaqsartý úshin birqatar qadamdar usyndy.

«Óndiriletin jeke qorǵanys quraldarynyń, onyń ishinde oq ótpeıtin saýyttar men dýlyǵalar jáne qorǵanys qalqandarynyń jıyntyǵyn memlekettik standartqa sáıkestigin rastaıtyn senimdi zerthana men sertıfıkattaý organdarynyń máselesin qarastyrý qajet. Sondaı-aq Qazaqstannyń otandyq óndirýshileri arasynda jeke qorǵanys quraldaryn satyp alý rásimderin ótkizý múmkindigine taldaý jasaý qajet», - dedi Janna Asanova Úkimet basshysy Álıhan Smaıylovtyń atyna joldaǵan saýalynda.