Depýtat qoldy bolǵan balabaqsha ǵımarattaryn túgendeýdi usyndy

ASTANA. QazAqparat –Májilis depýtaty Erlan Saırov «Amanat» atynan saılanǵan máslıhat depýtattarynyń respýblıkalyq forýmynda kezinde qoldy bolyp ketken balabaqsha ǵımarattaryna revızııa júrgizýdi usyndy, dep habarlaıdy QazAqparat tilshisi.

«Májilistegi «Amanat» fraktsııasynyń depýtattary «Zańsyz ıelengen kapıtaldy qaıtarý» jóninde zańdy qabyldaǵanyn bilesizder.

Bul bizdiń ata-baba, áke-sheshemizdiń barsha urpaǵyna qaldyrǵan ıgilikterin aldap-arbap, ártúrli quıtyrqy árekettermen halqymyzdyń aýzynan jyryp alǵan baılyqty memleketke qaıtarýdyń naqty qadamy.

At tóbelindeı top «ózimshildikten ózegi órtenip», shet elge mıllıardtaǵan dollardy shyǵaryp áketken.

Ashyǵyn aıtqanda, óz ultynyń, óz halqynyń qazyna–baılyǵyn aıaýsyz urlaǵan!

Al endi, keıingi otyz jyl ishinde tek qana iri zaýyt, fabrıka, ónerkásip nysandary ǵana qoldy boldy ma? Árıne, joq», - dedi Erlan Saırov.

Onyń sózinshe, aımaqtyq deńgeıde balabaqsha, mádenıet oshaqtary, jergilikti elektr jeli magıstraldary da qoldy bolyp ketken.

«Jergilikti jerde adamdar sol naqty balabaqsha men mádenıet oshaǵynyń, mektep oqýshylarynyń jazǵy demalys oryndaryn el ıgiligine jumys istegenin kórgisi keledi. Osy másele boıynsha bizdiń partııa músheleri barlyq deńgeıde jumys istegeni jón tárizdi. Elimiz boıynsha qansha balabaqshanyń qoldy bolǵany jóninde revızııa jasap, olardy memleketke qaıtarýdyń jolyn qarastyrǵan jón.

Qoldy bolǵan oqýshylardyń jazǵy demalys oryndaryn da memleketke qaıtarý qajet. Biz qoldy bolǵan qarajatty elge qaıtarý jumysyn aıaǵyna deıin jetkizýimiz kerek», - dedi depýtat.