Depýtat Qoǵamdyq keńestiń mańyzdy jumysy týraly aıtty

NUR-SULTAN. QazAqparat - Jaıylymdyq jerdiń bolmaýy - jergilikti ákimderdiń halyqtyń muń-muqtajyna nemquraıly qaraýynan týyndaıtyn másele. Bul týraly Antikor Live baǵdarlamasynda QR Parlamenti Májilisiniń depýtaty Erlan Saırov aıtty, dep habarlaıdy QazAqparat tilshisi.

«Sybaılas jemqorlyqqa qarsy qoǵamdyq keńestiń kelesi otyrysynda maldyń jaıylymy máselesin qaraımyz. Bul - óte ózekti másele. Ózderińiz bilesizder, jaqynda ǵana Túrkistan oblysyndaǵy aýyl azamattary jaıylymdyq jer joq ekenin aıtyp ákimdik aldynda jınaldy. Bul Qazaqstannyń barlyq oblysynda bar másele. Kóptegen aýdanda latıfýndıster jerdiń bárin alyp qoıǵan jáne jerdi paıdalanbasa da halyqqa paıdalanýǵa beriden bas tartady», - deıdi Erlan Saırov.

Ol Shyǵys Qazaqstannyń Tarbaǵataı aýdany, Jańalyq aýylynda da osyndaı másele bolǵany týraly aıtty.

«Aýyl turǵyndary mal jaıyp júrgen jerdi qazyp, ol jerge mal jaıýǵa tyıym salyp tastaǵan. Sonda halyq qaıda barady? Marsqa ushyp ketetin Ilon Mask emespiz ǵoı. Munyń bári jergilikti ákimderdiń halyqtyń muń-muqtajyna nemquraıly qaraýynan týyndaıdy. Bizdiń qoǵamdyq keńes quqyq qorǵaý organdarynyń ornyn almastyra almaıdy, biraq osyndaı máselelerdiń aldyn alý jaǵyn qarastyrady», - deıdi ol.

Eske salsaq, «Nur Otan partııasy Parlament saılaýynda jeńiske jetkennen keıin óziniń saılaýaldy baǵdarlamasyn naqty júzege asyrý quraly retinde partııa janynan jan-jaqty keńes qurdy. 14 keńestiń biri - Sybaılas jemqorlyqqa qarsy is-qımyl jónindegi qoǵamdyq keńes.