Depýtat keler jyldy zorlyq-zombylyqqa qarsy kúres jyly dep jarııalaýdy usyndy
«Otbasyndaǵy zorlyq-zombylyqqa jol bermeý kezek kúttirmeı sheshetin máselege aınaldy. Eldi eleń etkizgen sońǵy habarlar qoǵamdyq sanany dúr silkindirdi. Osy qorqynyshty jańalyqtar izimen harassment oqıǵalary da tez tarady. Jaqynda Astana medıtsına ýnıversıtetinde professor-oqytýshynyń stýdentke jasaǵan jynystyq qysym faktisi anyqtaldy. Osydan keıin álimjettik kórgen stýdentter óz oqıǵalaryn áleýmettik jelide jarııalaı bastady. Jeke ózime ártúrli oqý oryndarynyń stýdentterinen 100-den asa hat kelip tústi», - dedi Q.Ábden Premer-Mınıstrdiń orynbasary Tamara Dúısenovanyń atyna joldaǵan saýalynda.
Depýtat jynystyq qysymǵa ushyraǵan elordalyq boıjetkenniń isimen tanysyp, bul salada kemshilikterdiń kóptigine kózi jetkenin aıtty.
«Dál búgin elimizdiń oqý oryndarynda qansha harassment oqıǵasy oryn alǵanyn dóp basyp aıtý qıyn. Sebebi statıstıka júrgizilmeıdi. Al zańda harassment uǵymy atymen joq. Jalpy zorlyq-zombylyqtyń qaı túrin bolsyn, ıaǵnı harassmentti de qatań qarap, zań jobasyna birqatar ózgertýler men tolyqtyrýlar engizý kerek. Bul joly stýdent qyzymyz batyl bolyp shyqty. Esh qoryqpastan bolǵan jaǵdaıdy jaıyp saldy. Tıisti sheshim qabyldanyp, álgi harasser jumystan shyǵaryldy. Biraq, biz mundaı máseleni árqashan stýdenttiń – batyldyǵyna, basshynyń – ádildigine senip qoıa almaımyz. Júıeli, keshendi sheshimder kerek», - dedi ol.
Bul turǵyda depýtat harassmentke qatysty anonımdi saýalnamany elimizdiń barlyq joǵary oqý oryndarynda táýelsiz túrde ótkizýdi usyndy. Sonymen qatar, barlyq joǵary oqý ornynyń jarǵysyna harassment týraly naqty erejeler engizýdi surady.
«Bas prokýratýranyń derekteri boıynsha 2023 jyldyń 10 aıynda turmystaǵy zorlyq-zombylyqtan 85 áıel qaza tapqan. Qorqynyshty statıstıka. Harasment te zorlyq-zombylyqtyń bir túri. Aıtylǵan oıymdy qorytyndylaı kele, keler jyldy zorlyq-zombylyqqa qarsy kúres jyly dep jarııalaýdy usynamyn», - dedi Qaraqat Ábden.
Eske salsaq, jaqynda senator Darhan Qydyráli elimizdegi áıelderdi jumys ornynda harassmentten qorǵaýdy talap etti.