Depýtat Qazybek Isa memlekettik tildiń qoldanylýyna qatysty Úkimetke usynys jasady
«Qazaqstan Prezıdenti bolyp saılanǵanda «Eń bastysy – Qazaq tili» dep málimdegen Qasym-Jomart Kemeluly Toqaev Qazaqstan Halqyna jasaǵan alǵashqy joldaýynda: «Qazaq tili – ultaralyq qatynas tiline aınalýy kerek» dep, atap kórsetkeni, elimizdiń úmitin oıatty. Al 2018 jyly Elbasy memlekettik tildiń qoldaný aıasyn keńeıtý maqsatynda: «Parlament pen Úkimettiń jumysy tek memlekettik tilde júrgizilýi tıis» dep, naqty tapsyrma berdi. Elbasy da, Memleket basshysy da tapsyrǵan memlekettik tildiń óz atyna saı bolý talabyn keıinge qaldyrýǵa bolmaıdy», - dedi depýtat.
Osy oraıda ol qoǵam memlekettik tildiń barlyq salada qoldanylýyn talap etip otyrǵanyn atap ótti.
«2020 jyly 28 jeltoqsanda Ulttyq keńes múshelerimen kezdeskende QR Mádenıet jáne sport mınıstri Aqtoty Raıymqulova bul usynysymyzdyń óndiriske alynyp, qoǵam talabyna saı Memlekettik til týraly zań jobasy tujyrymdamasy jasalyp, 2020 jyly tamyz aıynda Úkimetke jiberilgenin málimdedi. Qazir halqymyz 19 mıllıonǵa, onyń ishinde qazaq ulty 78 paıyzǵa jetip qaldy. Al sol halyqqa qyzmet kórsetetin mamandardyń memlekettik tildi bilmeýi azamattardyń qyzmet alý quqyǵyn aıaq asty etip otyr», - dedi Qazybek Isa.
Osy oraıda depýtat memleket qyzmetshiler qazaq tilin erkin meńgerýi tıistigin atap ótti.
«Memlekettik tildiń mártebesin jeke dara anyqtaıtyn ýaqyt jetti! Sebebi, Al qazir Táýelsizdigimizge 30 jyl tolyp otyrǵanda memlekettik til týraly óz statýsyn tolyqqandy atqara almaǵan zańymyz demografııalyq jáne demokratııalyq zańdylyqtarmen óz kúshin joıyp otyr… Sýǵa túspeı júzýdi úırený qandaı múmkin bolmasa, memlekettik tildi mindettemeı, ony úırený de sondaı múmkin emes! Al eshbir zańda ne baǵdarlamalarda, memlekettik organdarda mindetti túrde memlekettik tildi bilý týraly norma joq. Sondyqtan da, bıyl 5 qańtarda QR Prezıdenti Qasym-Jomart Toqaev «Táýelsizdik bárinen qymbat» atty maqalasynda: «Memlekettik tildi bilý – Qazaqstannyń árbir azamatynyń mindeti»- dep naqty atap kórsetip berdi», - dedi Qazybek Isa.
Bul rette depýtat joǵaryda aıtylǵandardyń negizinde tıisti usynystardy jasady:
1) Memlekettik qyzmetshilerdiń, quqyq qorǵaý organdary qyzmetkerleri men sottardyń jáne kópshilikke qyzmet etý mekemeleri qyzmetkerleriniń mindetti túrde memlekettik tildi bilýi týraly standart engizý;
2) Memlekettik qyzmetshilerdiń memlekettik tildi meńgerý deńgeıin anyqtaýdyń júıesi men tártibin belgileý, onyń qajetti mehanızmderin jasaý;
3) Zań aktileri men ózge de normatıvtik quqyqtyq aktilerdi, memlekettik organdardyń qujattary men hattaryn, aqparattary men esepterin, is qaǵazdaryn jáne t.b. resimdeýdiń negizgi nusqasy – tek memlekettik tilde júzege asýy tıis.
4) Kez kelgen tildin damýynyń kepildigi – onyń ekonomıkalyq jáne qarjylyq salada qajettiligi. Sol sebepten memlekettik tildi eń aldymen ekonomıkada da qoldanýdy kúsheıtý qajet.
«Bizge de áleýetti ınvestorlardy, sheteldik kompanııalardy qosa alǵanda kelisim-sharttarda memlekettik tildi mindetti túrde paıdalaný talabyn belgileý kerek», - dedi Qazybek Isa.