Depýtat qazaqstandyq jýrnalıske jasalǵan qastandyqqa kimniń qatysy bolýy múmkin ekenin aıtty

<p>ASTANA. KAZINFORM &ndash; Májilis depýtaty Aıdos Sarym Parlament palatalarynyń birlesken otyrysynan keıin BAQ ókilderiniń suraǵyna bergen jaýabynda Ýkraınadaǵy qazaqstandyq jýrnalıst Aıdos Sadyqovqa jasalǵan qastandyqtyń artynda kimder turýy múmkin ekenin aıtty.&nbsp;</p>

«Bul jerde eki nársege nazar aýdarý kerek sııaqty. Birinshiden, Qazaqstan taraby Ýkraınanyń kúshtik qurylymdarymen jáne qajet bolsa Interpol sııaqty belsendi, bedeldi qoǵamdyq tergeý organdarymen jumys isteýge ázir ekenin Prezıdent te aıtty. Meniń oıymsha, emotsıonaldyq áńgimeler artyqtaý. Eshqandaı dálelsiz bir adamǵa nemese bir ınstıtýtqa nemese memleketke jala jabý – úlken aqyldyń sharýasy emes», - dedi depýtat.

Sondaı-aq ol jyldar boıy «Báse» arnasyn kórip kele jatqanyn aıtty.

«Ekinshiden, óz basym da bul is tez ashylatyn qylmys shyǵar, kem degende atqan adamdardy tabady dep oılaǵanmyn. Bul zamanda, beınekamera bar, ınternet bar, telefon bar degendeı, tez tabýǵa bolady ǵoı. Endigi másele kim ekenin tabýda. Men talaı jyldar boıy osy kanaldy kórip kelgen adam retinde aıtsam, talaı adamdardyń bedeline de qatysty, mekemelerge de qatysty qujattar shyǵyp jatyr. Olardyń da qatysy bolýy múmkin. Búgingi Qazaqstannyń upaıyn jyqqysy keletinde kúshter joq emes. Sondyqtan tergeýdiń nátıjesin kúteıik», - dedi Aıdos Sarym.

Prezıdent keńesshisi – baspasóz hatshysy Berik Ýálı Memleket basshysynyń atalǵan oqıǵany tergeý amaldaryn jiti baqylap otyrǵanyn aıtqan edi.