Depýtat Káletaev «Elbasy» termınin saıası sózdikke engizýdi usyndy

ASTANA. QazAqparat - QR Parlament Senatynyń depýtaty Darxan Káletaevtyń aıtýynsha, Qazaqstannyń modernızatsııasyn iske asyrý aıasynda Tuńǵysh Prezıdenttiń kóshbasshylyq qasıetin áli de asha túsý kerek. Al «Elbasy» termınin saıası sózdikke engizýge ábden bolady, dep xabarlaıdy QazAqparat tilshisi.

«Shyny kerek, Elbasy Nursultan Nazarbaev týraly jazylǵan kitaptar barshylyq. Alaıda Prezıdentimizdiń batyl reformalardy iske asyrý salasyndaǵy kóshbasshylyq qasıeti tolyǵymen ashylǵan joq. Nursultan Nazarbaevtyń bastamalary naqty eki basymdyqqa negizdelgen. Ol - ınnovatsııalyq baǵdar men evolıýtsııalyq qozǵalys. Dál osy eki element Qazaqstannyń jańǵyrý modelin tabysty túrde iske asyrýǵa kepil boldy. Al Memleket basshysynyń pragmatızmi naqty maqsattardy oryndaýǵa jeteledi», - dep atap aıtty senator Darhan Káletaev QR Tuńǵysh Prezıdenti kúnine arnalǵan xalyqaralyq parlamenttik konferentsııada.

Depýtattyń aıtýynsha, KSRO ydyraǵannan keıin Qazaqstandy jedel modernıatsııalaýǵa týra keldi. Burynǵy júıe tıimsiz bolyp qaldy. Bárin jańadan bastaý kerek edi. Sol kezde Nursultan Nazarbaevtyń bastamasymen bir jaǵynan sheteldik texnologııalar jetkizilse, ekinshi jaǵynan burynǵy keńestik mamandar jańǵyrtý sharalaryna jumyldyryldy. Memleket basshysy sonyń bárin sheber uıymdastyra bildi.

«Bul - jańa qoǵamdy qurýdyń ámbebap úlgisi. Ony ǵylymı turǵyda jan-jaqty zerdeleý kerek. Bálkim, atalǵan tájirıbe saıası ǵylymdarǵa «Nazarbaev modeli» bolyp enedi. Osydan birneshe jyl buryn biz birqatar qoǵam qaıratkerlerimen birge «Elbasy» atty mártebeni engizýdi usyndyq. Negizi, osynyń ózi elimizde ámbebap qoǵamdyq-saıası ınstıtýttyń qalyptasqanyn kórsetse kerek. Sebebi ol «Elbasy» - Nursultan Nazarbaevtyń mártebesi ǵana emes, ulttyq jańǵyrtý jobasynyń basty faktory. Menińshe, Qazaqstannyń saıası sózdigine «Elbasy» termınin engizý kerek. Ony ulttyq jańǵyrtýǵa negiz bolǵan ámbebap saıası ınstıtýt retinde qarastyrǵan jón», - dep atap kórsetti depýtat Káletaev.