Depýtat qalalardyń ekologııalyq jaǵdaıyna alańdaýshylyq bildirdi

NUR-SULTAN. QazAqparat – Senattyń jalpy otyrysynda depýtat Ábdáli Nuralıev qorshaǵan ortanyń lastanýyna baılanysty alańdaýshylyq bildirip, bul jurtshylyq nazaryn aýdaratyn ózekti taqyryptardyń biri ekenin atap ótti, dep habarlaıdy QazAqparat ttilshisi.

Osy oraıda ol bul týraly elimizdiń Premer-Mınıstri Álıhan Smaıylovtyń atyna depýtattyq saýalynda aıtty.

Depýtat qalalardaǵy ekologııanyń nasharlaýy adamdardyń ómir súrý sapasy men ahýalyna teris áser etetinin atap ótti. Ekologtar qalalarda atmosferanyń joǵary deńgeıde lastanýy saldarynan qurban bolatyndar jylyna orta eseppen 2%-ǵa kóbeıip bar jatqany jaıynda derekter keltirip otyr. Al úsh jyl ishinde qaterli isikke shaldyqqan naýqastar sany 14%-ǵa ósken. Ásirese, respýblıkalyq mańyzy bar jáne ónerkásibi bar qalalarda jaǵdaı nasharlap barady.

Senator osyǵan baılanysty óziniń depýtattyq saýalynda jaǵdaıdy jaqsartý úshin jumysqa qarqyn berý qajettigin aıtty.

«Qazaqstan Parıj kelisimine oraı 2030 jylǵa qaraı parnıktik gazdardyń shyǵarylýyn 15%-ǵa qysqartýdy mindetine alǵan. Esepti kezeńde nysanaly ındıkatorlardyń oryndalmaýyna baılanysty ekologııa məseleleriniń «Jol qartalary» pysyqtalyp, naqtylanýy kerek jáne is-sharalardyń nátıjeli júzege asyrylýy tıis dep sanaımyz. Sondaı-aq, qazirgi ýaqytta Qazaqstan kómirtekti beıtaraptanýdyń 2060 jylǵa deıingi doktrınasymen jumystar júrgizýde. Bul el múddesi úshin, tabıǵatqa jáne klımatqa uqypty qaraýdyń negizin qalaýy kerek», - dedi senator.