Depýtat fıtosanıtarııalyq qaýipsizdikti qamtamasyz etý salasyndaǵy birqatar máseleni kóterdi

ASTANA. QazAqparat – Senator Sultan Dúısembınov elimizdiń Premer-Mınıstri Álıhan Smaıylovtyń atyna joldaǵan depýtattyq saýalynda fıtosanıtarııalyq qaýipsizdikti qamtamasyz etý salasyndaǵy kúrdeli ahýal týraly aıtyp berdi, dep habarlaıdy QazAqparat tilshisi.

Depýtat elimizdegi jumystyń bul baǵytyna ósimdik karantıni jónindegi 559 memlekettik ınspektordyń jaýapty ekenin jáne onyń 172-si memlekettik shekaranyń perımetri boıynsha ornalasqan fıtosanıtarııalyq baqylaý beketterine tikeleı bekitilgenin atap ótti.

Senatordyń aıtýynsha, keıbir ınspektorlar baqylaý-ótkizý pýnktilerine jetý úshin 120 shaqyrymǵa deıin jol júrýi kerek. Sonymen qatar, olar kólik shyǵyndaryn ózderi kóteredi. Al, ınspektorlardyń jalaqysy – jumys ótiline qaraı 84 000 teńgeden bastap 146 000 teńgege deıin.

Depýtat ınspektorlardy materıaldyq-tehnıkalyq jaraqtandyrý jaǵdaıyn da nazardan tys qaldyrǵan joq. Oblystyq aýmaqtyq ınspektsııalarǵa 298 avtokólik qajet bolyp otyrǵan kezde, olardyń tek 259-y bar.

«Elimiz úshin fıtosanıtarııalyq qaýipsizdik mańyzyn eskere otyryp, fıtosanıtarııalyq baqylaý beketterin tıisti zamanaýı zerthanalarmen jáne basqa da materıaldyq-tehnıkalyq qamtamasyz etý maqsatynda tıisti is-sharalardy jedel túrde iske asyrý qajet dep esepteımiz. Bul is-sharalar júıeli túrde jáne respýblıkalyq deńgeıde júrgizilýi tıis. Baqylaý beketteriniń sanyn jáne olarǵa keletin júktemeni eskere otyryp, memlekettik ınspektorlardyń shtat sanyn qaıta qarastyrýdy, sondaı-aq ınspektorlardyń jalaqysyn kóterý, basqa da qosymsha tólemder jasaý máselesin sheshýdi suraımyz», - dedi senator.

Foto: Adam Gault/Getty Images