Depýtat Espaeva: áleýmettik-kásipkerlik korporatsııalardy taratyp jiberý kerek

ASTANA. QazAqparat – Májilistiń jalpy otyrysynda depýtat Danııa Espaeva elimizdegi áleýmettik-kásipkerlik korporatsııalardyń (ÁKK) jumysyn synǵa aldy, dep habarlaıdy QazAqparat tilshisi.

«ÁKK-niń negizgi maqsaty óńirlerdiń ekonomıkalyq damýyna járdemdesý ekenine qaramastan, is júzinde olar turaqtandyrý qorynyń qarajatyna bılik etetin ákimdikter janyndaǵy sharýashylyq vedomstvolaryna aınalǵan. Bul jaıynda biz 2015 jyly aıtqan edik», - dedi D. Espaeva Úkimet basshysy Álıhan Smaıylovtyń atyna joldaǵan saýalynda.

Onyń sózine qaraǵanda, 2017-2020 jyldardaǵy depýtattyq saýaldarda ÁKK qyzmetiniń tıimdiligine jáne qoıylǵan mindetterdi oryndaýyna taldaý júrgizý talap etildi. Sybaılas jemqorlyqqa qarsy qyzmet agenttiginiń alqa májilisinde korporatsııalardyń negizgi tabysy depozıtterden paıyz ústemesin alýdan jáne múlikti satýdan, úlestes tulǵalarǵa tómen quny boıynsha jer ýchaskelerin berýden kelip jatqany atap ótildi.

«Budan basqa, azyq-túlik baǵasyn turaqtandyrýǵa 39 mlrd teńge jumsalǵanymen, nátıjeleri kózge kóringen joq. Nesıeler úlestes kompanııalarǵa berildi. Osy derek boıynsha ÁKK laýazymdy tulǵalaryna qatysty 11 qylmystyq is tirkelgen. Al shyǵyn 7 mlrd teńgeden asqan», - dedi depýtat.

Sóz sońynda D. Espaeva áleýmettik-kásipkerlik korporatsııalardy taratýdy jáne olardyń qyzmetiniń barlyq túrin básekeles ortaǵa berýdi usyndy.