Depýtat Ertaev general Muxtarovqa: Sizge qarý-jaraq saýdasy týraly aıtýǵa bolmaıdy

ASTANA. QazAqparat - Búgin QR Parlament Májilisiniń plenarlyq otyrysynda QR Qorǵanys vıtse-mınıstri Talǵat Muxtarov «Qarý-jaraq saýdasy týraly kelisimdi ratıfıkatsııalaý týraly» zań jobasyn tanystyrdy. Tómengi palata atalǵan qujatty qoldady. Alaıda depýtat Baqytjan Ertaev general Muxtarovqa eskertý jasady, dep xabarlaıdy QazAqparat tilshisi.

«Talǵat Sábıtuly, Memleket basshysy, Joǵary Bas qolbasshy Nursultan Nazarbaev sizderdi qarý-jaraq saýdasynan alystatty. Ol jaıynda aıtýǵa da ruqsat joq. Áskerı adam óziniń qasıetti boryshy - Otandy qorǵaýmen aınalysýy qajet. Soǵan kásibı turǵyda daıyn bolý qajet. Al basqa máseleler úshin Qorǵanys jáne aeroǵarysh ónerkásibi mınıstrligi qurylǵan bolatyn. Nege biz «pogondy» taǵyp alyp, qarý-jaraq saýdasy týraly baıandap turmyz. Negizi, dál qazir minberde siz emes, general myrza, basqa mınıstrliktiń ókilderi turýy tıis», - dedi depýtat Ertaev.

Vıtse-mınıstr Muxtarov atalǵan eskertýdiń oryndy ekenin jetkizdi. «Atalǵan másele burynnan beri qorǵanys mınıstrliginiń jumys josparynda bolǵan. Sol sebepti bizge baıandaýǵa týra kelip otyr», - dep atap kórsetti Muxtarov.

Aıta keteıik, otyrys barysynda depýtat Amanjan Jamalov QR Ulttyq tóraǵasy Danııar Aqyshevtiń atyna saýal joldap, blokcheın men krıptovalıýtalar boıynsha vedomstvoaralyq komıssııany qurýdy usyndy.