Depýtat Eńbek mınıstriniń málimdemesin synady
«Sizdiń jumys isteıtin zeınetkerlerge zeınetaqy tólemderin toqtatý týraly usynysyńyz narazylyq týdyrdy. Mundaı qadam eńbek jáne áleýmettik turǵyda qamtamasyz etý quqyǵyna kepildik beretin QR Konstıtýtsııasyna qaıshy keledi. Árbir Qazaqstan azamaty zeınetkerlik jasqa jetkende de adal eńbek etýge quqyly. Olaı bolmasa, kásibı muǵalimderdiń, dárigerlerdiń jáne basqa sanattaǵy mamandardyń tapshylyǵyna baılanysty máseleni qalaı sheshe alamyz?!», - dedi A. Sarym QR Eńbek jáne halyqty áleýmettik qorǵaý mınıstri Svetlana Jaqypovanyń atyna joldaǵan saýalynda.
Onyń aıtýynsha, enbek.kz málimetine sáıkes, 4 qarashadaǵy jaǵdaı boıynsha 53 826 bos jumys orny bolsa, onyń ishinde 13 356-synda eńbek ótili talap etilmegen.
«Taǵy bir tendentsııa bar – Qazaqstannan shetelge jumys kúshiniń ketýi, olar negizinen - jastar. Bul úrdister jumys oryndarynyń jetispeýshiliginen emes, tómen jalaqy jáne tartymsyz jumys jaǵdaılaryna qatysty», - dedi depýtat.
Onyń paıymynsha, joǵaryda atalǵan bastamalar urpaqtar arasyna alaýyzdyq týdyryp, zeınetkerlerdi jastarǵa qarsy qoıady. Zeınetkerler jastardyń jumys oryndaryn «ıemdenip otyr» degen argýment negizsiz.
«Osy oraıda aldaǵy ýaqytta qoǵamda áleýmettik shıelenis týdyratyn málimdemelerden aýlaq bolýǵa shaqyramyn», - dedi Aıdos Sarym.
Aıta keteıik, Eńbek jáne halyqty áleýmettik qorǵaý mınıstri Svetlana Jaqypova «zeınetke shyǵyp, biraq jumys istep júrgen azamattarǵa zeınetaqy toqtatylýy múmkin be?» degen suraqqa jaýap berdi.
«Ótken jumada Eńbek resýrstaryn damytý ortalyǵynda BAQ ókilderimen beıresmı kezdesý ótkizdim. Bul saýal sol kezdesýde qoıyldy, biraq meniń jaýabymnan konteksti julyp alǵan. Men zeınetke shyǵýdyń 2 tásili baryn ıaǵnı erte jáne kesh shyǵý jáne bul ázirge usynys ekenin aıttym. Bul usynys qazir zeınetaqy alyp otyrǵan azamattarǵa eshqandaı kedergi keltirmeıdi. Olar qalaı zeınetaqysyn aldy, qalaı jumys istep otyr, solaı ári qaraı jalǵasa beredi», - dedi Svetlana Jaqypova Úkimet otyrysynan keıin ótken baspasóz máslıhatynda.