Depýtat egistikterdi sýarý jelisi ábden tozǵanyn aıtty

NUR-SULTAN. QazAqparat – Sýarmaly jerlerdi qalpyna keltirý boıynsha naqty sharalar qabyldanǵan joq. Bul týraly Bul týraly Májilistiń jalpy otyrysynda depýtat Qaınar Abasov málim etti, dep habarlaıdy QazAqparatt tilshisi.

«Búgingi tańda sý resýrstaryn tıimsiz paıdalaný ózekti másele bolyp otyr. Atap aıtqanda, bul sýdy kóp qajet etetin eskirgen óndiristik tehnologııalardy qoldaný jáne tasymaldaý kezinde sý shyǵynynyń joǵary deńgeıi (60% - ǵa deıin). Jalpy, respýblıkalyq menshikte uzaqtyǵy shamamen 20 myń shaqyrym bolatyn 3298 sýarý jelisi bar, onyń 11,9 myń shaqyrymy tozyǵy jetken, sonyń saldarynan aýyl sharýashylyǵy jerleri sýarmaly sýmen tolyq qamtamasyz etilmeıdi. Nátıjesinde, «Nur Otan» partııasynyń saılaýaldy baǵdarlamasyn oryndaý jónindegi Jol kartasyna sáıkes, 600 myń gektar jańa sýarmaly jerlerdi ıgerýdiń jáne olardy 2,2 mln gektarǵa deıin jetkizýdiń ornyna is júzinde qolda bar sýarmaly jerler azaıyp keledi. Al sýarmaly jerlerdi qalpyna keltirý boıynsha naqty sharalar búgingi kúnge qabyldanǵan joq», - dedi Q. Abasov Premer-Mınıstrdiń orynbasary Roman Sklıardyń atyna joldaǵan saýalynda.

Onyń paıymynsha, qarqyndy tehnologııalardy engizý 1 gektardan 10 mln teńgege deıin tabysty arttyrýǵa múmkindik beredi. Úlgi esebinde Túrkistan oblysynda birneshe sharýashylyqtardyń jetistikterin baıqaýǵa bolady.

«Sondyqtan joǵaryda atalǵan problemalar eldiń azyq-túlik qaýipsizdigi turǵysynan óte mańyzdy jáne jan-jaqty, keshendi, strategııalyq sheshimder qabyldaýdy talap etedi. Irrıgatsııalyq júıelerdi qalpyna keltirýmen birge, zamanaýı ylǵal únemdeý tehnologııalaryn jappaı engizý qajet. Biraq munda da problemalar bar - bul elektr energııasynyń jáne qajetti ınfraqurylymnyń qymbattylyǵy», - dedi depýtat.

Osyǵan baılanysty, joǵaryda atalǵan problemalardy sheshý úshin kelesi sheshimderdi qabyldaý qajet:

- Qazirgi zamanǵa saı ırrıgatsııalyq júıelerdi salý jáne paıdalanystaǵy júıelerdi jańǵyrtý. Nátıjesinde, bul kanaldardyń qurylysy jáne olardyń uzaqtyǵy boıynsha esep emes, sýarmaly sýmen tolyq qamtamasyz etilgen jerlerdiń kólemi bolý kerek.

- Sý únemdeý tehnologııalaryn engizýde qoldanystaǵy satyp alýǵa jáne qurylysqa beriletin sýbsıdııanyń kólemin 50% ornyna 80% - ǵa deıin ulǵaıtý qajet. Sý únemdeý tehnologııasynyń qajettilikteri úshin balamaly energııa kózderin salýdy sýbsıdııalaý qajet.

- «Qazsýshardyń» jaýapkershiligi sýarmaly sýdyń jetkiziletin kólemi boıynsha emes, sýarmaly sýmen qamtamasyz etilgen jerdiń kólemi boıynsha bolý kerek.

- Irrıgatsııalyq júıelerdi salý kezinde memlekettik-jekeshelik áriptestigin engizý arqyly ınvestıtsııalar tartýdy qamtamasyz etý.