Depýtat egis alqaptary taptalǵan sharýalardyń shyǵynyn óteý máselesin kóterdi
«Sońǵy málimitterge sáıkes, kıik sany 2 mıllıonnan asqan. Onyń 90 paıyzy Qazaqstannyń batysynda. Negizinde salalyq mınıstrliktiń esebi boıynsha kıikterdin sany 750-770 myńnan aspaýy kerek edi. Jaıylymdyq jerdiń ózin aıtpaǵanda, sharýa qojalyqtary mańdaı terimen ekken egistikterdi kıikter toby bir taptap ótkende-aq mıllıondaǵan qarjysy jelge ushady. Máselen, Aqmola oblysynda jylyna 150 myńdaı gektar egin alqaby búlinedi, orta eseppen 1 gektardan 10 tsentner ónim zaıa ketse, sol óńirdiń sharýalary 14 mlrd teńge shyǵynǵa ushyraıdy. Nesıeni óteı almaǵan sharýalar bankrot bolady. Bundaı jaǵdaıda Úkimettiń jaıbasarlyǵy tań qaldyrady. Taptalǵan egistikke qatysty shyǵynnyń óteýi joq. Buǵan meniń esh qatysym joq dep, tek syrttan ǵana qarap qalaı otyra alamyz?», - dedi A. Zeınýllın Úkimet basshysy Álıhan Smaıylovtyń atyna joldaǵan saýalynda.
Onyń aıtýynsha, túrli sebeptermen mert bolǵan kıikter de kóp kezdesedi.
«Kádege jaratpasa da, qabyrǵany bezendirermin degen oımen mert bolǵan kıik múıizin kesip alǵandar sottalyp jatyr, onyn ishinde bilmestik jasaǵan jasóspirimder de bar. Bul jerde zań talaptaryn buzǵandardy jaqtap otyrǵanymyz joq. Máseleni osyndaı deńgeıge deıin jetkizbeý kerek. Bul jerde kıiktiń emes, adamnyń obalyna qalatyn sııaqtymyz. Árıne bul durys emes. Qazaqstanǵa kıik máselesimen qanshama shet eldik sarapshylar kelgenimen, eshqandaı naqty sheshim joq», - dedi depýtat.
Onyń paıymynsha, Úkimet sharýalardyń shyǵynyn tolyq ótep berý tetigin engizýi kerek.
Budan buryn habarlanǵandaı, 24-28 mamyrda halyqaralyq sarapshylar Qazaqstandaǵy kıik mekenderinde zertteý júrgizedi.
Jaqynda Ekologııa jáne tabıǵı resýrstar mınıstrligi Batys Qazaqstandaǵy kıikterdiń qyrylýyna qatysty pikir bildirdi.
19 mamyr kúni saǵat 18-00 shamasynda Batys Qazaqstan oblysy Jánibek aýdany Kúıgengúl okrýginiń aýmaǵy Aşyózek ózeniniń jaǵasynan Jánibek tirek pýnktiniń toby 150-ge jýyq kıik óleksesin anyqtaǵan.
Jaqynda Premer-Mınıstr Álıhan Smaıylov Senat depýtattarynyń saýalyna joldaǵan jaýabynda kıikterge arnap sý qoımalary salynatynyn aıtty.
Qazaqstanda kıikterdi qorǵaý úshin 200-den astam arnaıy top quryldy.