Depýtat: «Dıplommen aýylǵa» barǵan jastar qalaǵa qaıta kóshýde

ASTANA. QazAqparat – Májilis depýtaty Naýryz Saılaýbaı «Dıplommen aýylǵa» baǵdarlamasynyń talaptaryn qaıta qaraýdy usyndy, dep habarlaıdy QazAparat tilshisi.

«Qazaqstanda 2009 jyly qabyldanǵan «Dıplommen aýylǵa» jobasy búginge deıin júzege asyrylyp keledi. Joba aıasynda kelgen mamanǵa 100 aılyq eseptik kórsetkish (AEK) birjolǵy kóterme járdemaqy beriledi. Al turǵyn úı satyp alý úshin jyldyq 0,01 % mólsherinde 15 jylǵa deıingi merzimge 1 500 (AEK) aılyq eseptik kórsetkishte kredıt túrinde áleýmettik qoldaý sharalary eskerilgen.

Bul baǵdarlamanyń júzege asyp jatqanyna 14 jyl boldy. Mamandarǵa muqtaj óńirler kóbeımese, azaıǵan joq. Óz mindettemesin oryndap, úsh jyl aýylda jumys istegen mamandar tıisti merzimi aıaqtalǵan soń júgin býyp-túıip, qaıtadan qalaǵa kóship ketip jatyr. Jyldar boıy bıýdjetten qarjy quıylyp kelgen baǵdarlama nege mindetin minsiz oryndaı almaı jatyr?», - dedi N. Saılaýbaı Májilistiń jalpy otyrysynda Premer-Mınıstrdiń orynbasary Altaı Kólginovtiń atyna joldaǵan saýalynda.

Onyń aıtýynsha, kóshken jas mamandardyń baǵdarlamadan aınyp, qalaǵa qaıtyp ketýiniń salmaqty sebebi – turǵyn úıdi satyp alý qıyndyqtary jáne ortalyqtandyrylǵan sý men jylýdyń jabdyqtalýynyń joqtyǵy.

«Nátıjesinde, kóptegen aýyl áli kúnge deıin tájirıbeli muǵalimsiz, bilikti dárigersiz otyr. Memleketten beriletin birrettik 345 myń teńge nege jetedi?! Qazir azyq-túliktiń aýyldaǵy quny, qaladaǵy baǵamen birdeı. Úıge dep beriletin 5 mıllıon teńgege úı ala alasyz ba? Osy oraıda, Jalpyulttyq sotsıal-demokratııalyq partııasy, aýylǵa barǵan mamandarǵa jaǵdaı jasaý maqsatynda tıisti usynystardy daıarlady. Atap aıtqanda, mamandarǵa beriletin birrettik kóterme járdemaqyny, ár otbasy múshesine ıaǵnı adam basyna 150 (AEK) aılyq eseptik kórsetkishke (520 myń teńgege) deıin arttyrý kerek», - dedi depýtat.

Onyń sózine qaraǵanda, aýyldar túgili keıbir aýdandardyń ózinde «Dıplommen – aýylǵa» baǵdarlamasynyń krıterıılerine sáıkes keletin turǵyn úıler joq. Sondyqtan da jas mamandarǵa 5 mln teńgege kredıt bergenshe, jańa úıler salyp berý nemese baspana satyp alýǵa jáne salýǵa beriletin nesıe mólsherin 3000 aılyq eseptik kórsetkishke (10 mln teńgege) deıin ulǵaıtý qajet.

«Baǵdarlama aıasynda aýyldarǵa baratyn mamandardyń 70% jas otbasylar bolǵandyqtan, mindetti eńbek ótilimin 3 jyldan 5 jyl nemese 7 jyl aralyǵyna deıin uzartý qajet», - dedi Naýryz Saılaýbaı.

Budar buryn habarlanǵandaı, 2009-2022 jyldar aralyǵynda «Dıplommen aýylǵa» jobasy arqyly 45 myń mamanǵa turǵyn úı satyp alý úshin kredıt berildi.