Depýtat dárigerlerdiń jaýapkershiligin qamtıtyn zań jobasyna qatysty pikir bildirdi

ASTANA. QazAqparat - Májilis depýtaty Ǵalymjan Eleýov medıtsına qyzmetkerleriniń kásiptik jaýapkershilikti saqtandyrý tetikterin engizýge baılanysty pikirin bildirdi, dep habarlaıdy QazAqparat.

«Qazaqstan Respýblıkasynyń keıbir zańnamalyq aktilerine densaýlyq saqtaý máseleleri boıynsha ózgerister men tolyqtyrýlar engizý týraly» zań jobasyn Májilis depýtattary ótken aptada qaraǵan bolatyn.

«Densaýlyq saqtaý mınıstrligi osy zań jobasy sheńberinde medıtsına qyzmetkerleriniń kásiptik mindetterin tıisti deńgeıde oryndamaǵany úshin qylmystyq quqyq buzýshylyqtardy izgilendirý, sanktsııalyq sharalardy tómendetý týraly normalardy usynyp otyr. Bul - dárigerlerdi saqtandyrýǵa baǵyttalǵan kópten kútken zań», – dedi Ǵ.Eleýov.

Depýtat zań jobasyna usynystar berip, normalar engizetinin, bul zańnyń árbir adamǵa tikeleı qatysy bar ekenin aıtty.

«Men ózim oblystyq aýrýhananyń kezekshi hırýrgynan klınıka basshysyna deıin barǵan dárigermin jáne tájirıbeli dárigerler qandaı quqyqtyq problemalarǵa tap bolatynyn jaqsy bilemin. Árıne, meniń áriptesterim qatelikter jibermeýge tyrysýy kerek. Biz bul zań jobasyn jumys tobynda keńinen talqylaýdy jalǵastyramyz», – dedi depýtat.

Onyń paıymynsha, biz dárigerlerimizdi qorǵaýymyz kerek.

«Bizde kóptegen bilikti dárigerler bar. Olardy zańdyq jáne qarjylyq jaǵynan qoldaý kerek. Sonymen qatar jastardy medıtsına mamandyǵyna qyzyqtyra bilýimiz qajet. Zań jobasymen jumysta bunyń bárin eskeretin bolamyz», – Ǵ.Eleýov.

Foto: parlam.kz