Depýtat bala kútimi boıynsha járdemaqy mólsherin arttyrýdy surady
«Ana men bala, olardyń densaýlyǵy men ál-aýqaty bir-birimen tyǵyz baılanysty. Sonymen, birinshi faktor – bala kútimi boıynsha járdemaqy múldem jetkiliksiz! Jumys istemeıtin áıelder úshin bala kútimi boıynsha aı saıynǵy járdemaqy: birinshi balaǵa 16 802 teńgeni, ekinshi balaǵa – 19 865 teńgeni, úshinshi balaǵa – 22 898 teńgeni, tórtinshi jáne odan artyq balaǵa – 25 961 teńgeni quraıdy. Bul bir balaǵa kúnine 560 teńgeden 865 teńgege deıin jumsalady degen sóz. Al qamaýdaǵy bir adamnyń tamaǵyna 1 018 teńge qarastyrylǵan. Balanyń anasyna járdemaqyda aqsha qarastyrylmaǵan!», - dedi depýtat Úkimet basshysynyń orynbasary Eraly Toǵjanovtyń atyna joldaǵan saýalynda.
Onyń paıymynsha, járdemaqylarǵa qatysty rásimderdiń kóptigi, olardy ákimshilendirýdiń kúrdeliligi sybaılas jemqorlyq shemalaryn týdyrady. Sondaı-aq azamattardy zańsyz áreketterge ıtermeleıdi. Mysaly, AÁK jaǵdaıynda adamdar otbasynyń tabysyn azaıtý maqsatynda ata-analardyń jalǵan ajyrasýy sııaqty jáne t.b. járdemaqy alýdyń shemalaryna júginedi.
Budan bólek A. Sqaqova osal toptaǵy qazaqstandyqtar úshin turǵyn úıdiń qoljetimsizdigi máselesine toqtaldy.
«Qolda bar memlekettik baǵdarlamalardyń jetkiliksiz ekenin túsiný kerek. Óıtkeni olar barlyq qazaqstandyqtarǵa jaramaıdy. Olar eń bolmaǵanda ortasha tabysy bar adamdarǵa arnalǵan», - dedi depýtat.