Depýtat: Áıelderdiń zeınet jasyn 58-ge túsirgenin biz de qalaımyz, biraq memlekettiń shamasyn da eskerý kerek

NUR-SULTAN. QazAqparat – QR Májilis depýtaty Natalıa Dementeva áıelderdiń zeınetke shyǵý jasy 2028 jylǵa deıin nege naqty 61 bolyp belgilengeni jaıly pikir bildirdi, dep habarlaıdy QazAqparat tilshisi.

«Áıelderdiń zeınet jasy odan ári kóteriledi degen oıda júrgen edik. Prezıdenttiń Joldaýda osy másele týraly aıtqan ustanymy óte oryndy dep oılaımyn. Óıtkeni 2028 jylǵa deıin áıelderdiń zeınetke shyǵý jasy 61-den joǵary bolmaıdy dep otyr. Osy jańalyqty bárimiz asyǵa kútken edik», - dedi depýtat Parlament kýlýarynda.

Aıtýynsha, saılaýshylar tarabynan da osyndaı bastama, usynystar kóp aıtylǵan.

«Bıyl 61 jastaǵy áıelder zeınetke shyǵady. Osy tizbekpen 63 jasqa deıin kóteriledi dep jobalanǵan dúnıe edi. 2028 jylǵa deıin 61-den ary kóterilmeıtini zeınet jasyna taıap júrgen talaı áıeldiń kóńiline qondy dep oılaımyn. El ishinde «Áıteýir túsirgen soń 58-ge deıin aparý kerek edi» degen pikirler de aıtylýy múmkin. Biraq bizdiń qalaýymyzdan bólek memlekettiń múmkindigi eskerilýi kerek. Prezıdent áıelderdiń 61 jastan bastap zeınetke shyǵatynyn jáne bul meje 2028 jylǵa deıin ózgermeıtinin aıtar aldynda tıisti esep júrgizilgeni anyq. Ekonomıster, sarapshylar otyryp, áıelderdiń zeınet jasyn qaı mejede qoısa, memleket múmkindigine syıymdy ekenin tarazylady. Sondyqtan bul durys qadam dep esepteımin»,- dedi Májilis depýtaty.

Aıta keteıik, Prezıdent Qasym-Jomart Toqaev Qazaqstan halqyna Joldaýynda 2028 jylǵa deıin áıelder 61 jastan zeınetke shyǵatynyn málim etti.