Depýtat «Atyraý–Astrahan» tasjolynyń problemasy týraly aıtty

NUR-SULTAN. QazAqparat – Májilismen Sálimjan Naqpaev depýtattyq saýal arqyly QR Premer-Mınıstriniń birinshi orynbasary Roman Sklıardan «Atyraý–Astrahan» jolynyń problemasyna aralasýyn surady, dep habarlaıdy QazAqparat tilshisi.

«Respýblıkamyzdyń batysyndaǵy uzyndyǵy 277 shaqyrym bolatyn «Atyraý-Astrahan» jolynyń mańyzdylyǵy kópten aıtylyp kele jatyr. Bul jolmen Atyraý qalasyna 100 myńnan asa halqy bar Isataı, Qurmanǵazy aýdandarynyń turǵyndary qatynaıdy jáne kórshi Reseı eliniń Astrahan oblysymen saýda-sattyq, týrızm, turmystyq qarym-qatynastar jasalady. Jospar boıynsha 2019 jyldan bastalyp, 2022 jyly tolyq aıaqtalýy tıisti bul jol, joba jasaýshylardyń bilimsizdiginen, ony qadaǵalaıtyn tıisti mınıstrliktiń salǵyrttyǵynan, 2023 jylǵa keshiktirildi. Bul aldymen jergilikti turǵyndardyń narazylyǵyn týdyrdy. Óıtkeni, adam shyǵynyna ákelgen apattar oryn alýda», - dedi depýtat.

Onyń aıtýynsha, atalǵan joldyń boıynda tórt birdeı merdiger jumys istep jatqanymen, jumys mardymsyz.

«Trassa boıynda 50-60 shaqyrym bolatyn, áli de jolshynyń qoly tımegen ýchastokter jatyr. Osynyń bári halyqtyń Úkimetke, Ulttyq jobalarǵa degen senimine nuqsan keltirýde. Jolǵa kerekti qarajat halyqaralyq qarjy ınstıtýttary arqyly tolyq sheshilgen. Merdiger sany biz biletin jerde tórteý, olardyń jaldaǵan sýbmerdigerleri odan da kóp. Eń bastysy mınıstrlik jumysty uıymdastyra almaı otyr», - dep synaǵan Májilis ókili Premer-Mınıstrdiń birinshi orynbasary Roman Sklıardan osy máselege tikeleı aralasýdy talap etti.

«Atyraý-Astrahan tasjolynyń mańyzyn jete túsinip, bolyp jatqan jol apattarynyń aldyn alyp, halyqtyń asyǵa kútken jobasyn ýaqytynda iske qosýdy talap etemiz», - dedi Sálimjan Naqpaev.

Eske salaıyq, Májilis depýtattary Dúısenbaı Turǵanov, Sálimjan Naqpaev jáne Serik Erýbaev Atyraý oblysy Isataı aýdanynyń turǵyndarymen kezdesýinde Atyraý–Astrahan jolynyń problamsyn baqylaýǵa alǵandaryn málimdegen edi.